12 ألف طن مخلفات سنويا تتحول لوقود نظيف.. تفاصيل أكبر تعاون بين مصر و"كلين كربون"
هل ممكن القمامة تتحول فعلًا لمصدر طاقة مهم في مصر؟، وهل مشروع تحويل المخلفات لوقود ممكن يقلل مشكلة الزبالة في الشوارع؟، وهل مصانع الأسمنت هتعتمد بشكل أكبر على الوقود البديل الفترة الجاية؟، هل ده بداية لصناعة جديدة قائمة على إعادة تدوير المخلفات؟، هل ممكن نشوف مشاريع زي دي في كل محافظات مصر؟، هل تحويل القمامة لطاقة أرخص من الوقود التقليدي؟.
في خطوة جديدة ممكن تغير طريقة تعاملنا مع القمامة في مصر، الحكومة أعلنت عن تعاون كبير مع شركة كلين كربون، والهدف بسيط لكنه مهم جدًا، وهو تحويل آلاف الأطنان من المخلفات لوقود نظيف بدل ما تبقى عبء على البيئة.
الفكرة ببساطة إن بدل ما القمامة تترمي في المدافن وتسبب تلوث وروائح ومشاكل صحية، يتم فرزها ومعالجتها وتحويل جزء كبير منها لنوع وقود اسمه SRF، وده وقود صناعي بيستخدم في مصانع الأسمنت بدل جزء من الوقود التقليدي زي الفحم والغاز.
المشروع الجديد هيستهدف معالجة حوالي 20 ألف طن مخلفات كل سنة، ومنهم حوالي 12 ألف طن هيتحولوا لوقود نظيف يقدر يشغل مصانع الأسمنت، يعني إحنا بنتكلم عن كمية كبيرة من القمامة بدل ما تضيع هتتحول لطاقة مفيدة للاقتصاد.
الميزة في الوقود ده أنه أنضف نسبيًا وبيساعد المصانع تقلل الانبعاثات الكربونية، وده بقى مطلب أساسي في العالم كله دلوقتي. الشركات الكبيرة بقت مطالبة إنها تقلل التلوث وتلتزم بمعايير البيئة، والمشروع ده بيساعد الصناعة في مصر تمشي في الاتجاه ده.. كمان المشروع مش مجرد مصنع وخلاص، ده نظام كامل بيبدأ من جمع القمامة، بعدها الفرز، وبعدها المعالجة باستخدام تكنولوجيا حديثة، وفي الآخر إنتاج وقود بمواصفات ثابتة تقدر المصانع تعتمد عليه بشكل مستمر.
الحكومة شايفة أن التعاون مع القطاع الخاص بقى ضروري في المشروعات البيئية الكبيرة، لأن الشركات المتخصصة عندها خبرة وتكنولوجيا حديثة، وده بيساعد أن التنفيذ يحصل أسرع وبجودة أعلى.
الميزة كمان أن المشروع ممكن يقلل الضغط على المدافن الصحية اللي بقت عبء كبير على المدن، خصوصًا مع زيادة عدد السكان وكميات المخلفات كل سنة.
مش بس كده، الخطة كمان أن التجربة تبدأ في أماكن مهمة زي المدن السياحية، وعلى رأسها الغردقة وشرم الشيخ، والسبب أن المناطق دي لازم تكون نظيفة بشكل مستمر عشان السياحة والبيئة البحرية، لأن أي مخلفات ممكن توصل للبحر بتأثر على الشعاب المرجانية والكائنات البحرية، وده ممكن يضر السياحة والبيئة في نفس الوقت، فالمشروع هنا بيحمي البيئة وكمان بيدعم الاقتصاد.
ولو التجربة نجحت، الخطة أن النموذج يتكرر في مدن تانية كتير في مصر، وده معناه أن القمامة اللي كانت مشكلة ممكن تتحول لمصدر طاقة وفرص استثمار وشغل كمان.
