وداعا لقطع النور.. تفاصيل أضخم مشروع مشترك بين مصر والسعودية
هل مشروع الربط الكهربائي فعلًا هيقضي نهائيًا على قطع النور في الصيف؟، وهل القدرة اللي هتوصل لـ3000 ميجاوات كافية لتأمين احتياجات مصر بالكامل وقت الذروة؟، وهل المواطن هيحس بفرق حقيقي في استقرار الكهرباء خلال 2026؟، وهل المشروع ده ممكن ينعكس على أسعار الكهرباء مستقبلًا؟، وهل الربط مع السعودية خطوة أولى لربط كهربائي أوسع مع دول عربية وأفريقية تانية؟
تخيل تبقى في عز الحر والنور ثابت، ومفيش تخفيف أحمال، ومفيش انقطاع مفاجئ.. الحلم ده ممكن يتحول لحقيقة قريب، بعد ما مصر والسعودية يعلنوا عن واحد من أضخم مشروعات الربط الكهربائي في المنطقة، مشروع مش بس بينور بيوت، ده بيرسم خريطة جديدة للطاقة في الشرق الأوسط.
القصة بدأت بإعلان رسمي عن إطلاق المرحلة الأولى من مشروع الربط الكهربائي بين البلدين، بقدرة توصل لـ 1500 ميجاوات في المرحلة الأولى بس، وده رقم ضخم يقدر يدعم الشبكة المصرية خصوصًا مع الاستعداد لصيف 2026، اللي دايمًا بيشهد أعلى معدلات استهلاك كهرباء، والفكرة دي أن كل دولة تقدر تدعم التانية وقت الذروة، يعني لما الحمل يعلى هنا، يبقى في بديل جاهز فورًا، والعكس صحيح.
المشروع تكلفته التقديرية حوالي 1.8 مليار دولار، وبيستخدم تكنولوجيا التيار المستمر عالي الجهد، ودي من أحدث التقنيات في نقل الكهرباء لمسافات طويلة بكفاءة عالية جدًا وفاقد أقل، الربط هيتم بين محطة بدر شرق القاهرة، ومحطات في المدينة المنورة وتبوك في السعودية، من خلال شبكة خطوط برية وبحرية بطول يقرب من 1350 كيلو متر، من بينها كابل بحري تحت خليج العقبة.
ومش ده بس، لأن بعد اكتمال المرحلة التانية القدرة الإجمالية هتوصل لـ 3000 ميجاوات، وده يخلي المشروع واحد من أقوى مشروعات الربط الكهربائي في المنطقة، ده معناه شبكة أكتر استقرارًا، وضغط أقل على محطات التوليد، وكفاءة أعلى في إدارة الطاقة.
كمان المشروع بيخدم هدف أكبر، وهو أن مصر تتحول لمركز إقليمي لتجارة الطاقة، خاصة مع خطتها لرفع نسبة الطاقة المتجددة لـ42% بحلول 2030، الربط ده هيساعد في تصدير أي فائض كهرباء لدول تانية، ويعزز مكانة مصر كمحور طاقة بين آسيا وإفريقيا وأوروبا.
يعني من الآخر، احنا مش بنتكلم عن سلك كهربا، إحنا بنتكلم عن شراكة استراتيجية ممكن تخلينا نقول فعلًا، وداعًا لقطع النور.
