تصدير الطاقة الكهربائية إلى آسيا وأوروبا.. مصر ترصد 16 مليار جنيه لاستكمال مشروعات الربط الإقليمي
هل مصر كده داخلة فعليًا عصر تصدير الكهرباء بدل ما تبقى مستوردة؟، ويعني إيه نصدر كهربا لآسيا وأوروبا؟ وإمتى ده هيبدأ على الأرض؟، ومشروع الربط الكهربائي مع السعودية هيغيّر إيه في خريطة الطاقة في المنطقة؟، والـ3000 ميجاوات تبادل كهربا، ده رقم كبير ولا لسه البداية؟، وهل الربط الإقليمي ده هيقلل قطع الكهربا في الصيف؟
خلّيك متخيل أن الكهربا اللي بتتولد جوه مصر، مش بس بتكفي بيوتنا ومصانعنا، لكن كمان بتطلع برا الحدود، رايحة آسيا وأوروبا، وبتدخل عملة صعبة وبتحول مصر من دولة مستهلكة للطاقة، لمركز إقليمي لتصديرها.. ده مش خيال، ده اللي الدولة شغالة عليه دلوقتي فعليًا.
مصر قررت ترصد حوالي 16 مليار جنيه في سنة واحدة بس، علشان تستكمل مشروعات الربط الإقليمي، سواء ربط كهربا أو ربط بري، والهدف الأساسي هو أن مصر تبقى نقطة وصل بين إفريقيا وآسيا وأوروبا.
الموضوع مش مجرد كابلات أو خطوط كهربا، ده مشروع نفوذ اقتصادي كامل.. لما يبقى عندك شبكة ربط قوية مع دول الجوار، تبقى قادر تصدر فائض الكهربا، وتكسب عملة صعبة، وتتحكم في توقيت البيع والشراء حسب الطلب.
خلينا نفهم الصورة كاملة.. الهيئة العامة للطرق والكباري شغالة ضمن خطة استثمارية ضخمة توصل لـ 30 مليار جنيه، جزء كبير منها رايح لمشروعات ربط إقليمي، طرق وكباري ومحاور بتربط مصر بدول إفريقيا، وده علشان التجارة والطاقة يتحركوا بسهولة.
ومش بس كده، ده مصر بدأت بالفعل المرحلة الأولى من الربط البري مع ليبيا، بطول 100 كيلومتر، وده معناه أن البنية الأساسية بتتجهز علشان تكون مصر بوابة حقيقية لإفريقيا.
نيجي بقى للملف الأهم، وهو الربط الكهربائي.. لأن مصر دخلت مرحلة التجارب النهائية لمشروع الربط الكهربائي مع السعودية، وده مشروع تاريخي بكل معنى الكلمة.. المشروع ده هيخلي مصر والسعودية يتبادلوا كهربا بقدرة توصل لـ3000 ميجاوات، المرحلة الأولى 1500 ميجاوات، وبعدها المرحلة التانية بنفس القدرة، يعني وقت الذروة عندك، تقدر تاخد، ووقت الفائض عندك، تقدر تبيع.
وده ليه مهم؟.. لأن ده بيفتح باب تصدير الكهربا من مصر، مش بس للسعودية، لكن من خلالها لآسيا وكمان لأوروبا، خصوصًا مع مشروعات الربط اللي شغالة على البحر المتوسط، يعني من الآخر مصر بتستغل موقعها الجغرافي، وشبكة الكهرباء القوية، ومحطات الطاقة اللي اتبنت خلال السنين اللي فاتت، علشان تدخل سوق جديد اسمه سوق تصدير الطاقة.
وده كمان بيحل مشاكل داخلية، لأن تبادل الفائض الكهربائي بيقلل الضغط في الصيف، ويمنع انقطاعات، وبيخلي الشبكة أكثر استقرارًا، وبيخلي أي استثمار جديد في الطاقة المتجددة ليه سوق مضمون.
يعني إحنا مش بنتكلم عن كهربا وبس،.. إحنا بنتكلم عن تجارة واستثمار ونفوذ وعملة صعبة، يعني من الآخر كده، الـ16 مليار جنيه اللي الدولة حطاهم مش مصروف، ده استثمار طويل الأجل، بيحول مصر من دولة عندها كهربا، لدولة بتبيع كهربا، وبتلعب دور محوري في خريطة الطاقة بين إفريقيا وآسيا وأوروبا.
