استخراج الكارت الذكي لمترو الأنفاق 2026.. الخطوات والمستندات المطلوبة كاملة
لو بتركب المترو يوميًا.. سواء شغل أو جامعة أو مدرسة، يبقى لازم تعرف إزاي تطلع الكارت الذكي لمترو الأنفاق 2026 بكل سهولة.
الكارت ده بتقدمه الهيئة القومية للأنفاق وبيوفر تخفيضات مهمة خاصة للطلبة وبعض الفئات.
أول خطوة.. تروح أقرب مكتب اشتراكات في أي محطة مترو، تشتري الاستمارة المناسبة لنوع الاشتراك بتاعك، وتملأ البيانات زي محطة القيام والوصول، الاسم، والوظيفة.
هتحتاج تحط 2 صورة شخصية 4×6 على الاستمارة.
لو أنت موظف في جهة زي الجيش أو الشرطة أو من ذوي الاحتياجات الخاصة، لازم تختم الاستمارة من جهة العمل أو الجهة التابع لها.. أما اشتراكات الجمهور العادي، فمش محتاجة ختم.
مع الاستمارة، بتقدم صورة بطاقة الرقم القومي، ولو أقل من 16 سنة.. صورة شهادة الميلاد الكمبيوتر… وبعض الفئات بتقدم صورة الكارنيه الخاص بيها.
طيب لو طالب؟ الموضوع بسيط برضه، تشتري استمارة طلبة وتحط 2 صورة 4×6، الصورة الأولى تتختم نص على الصورة ونص على الاستمارة، والصورة التانية تتختم من الخلف، والاستمارة تعتمد وتتختم بشعار الجمهورية من شؤون الطلاب.
لازم ترفق صورة بطاقة الرقم القومي أو شهادة الميلاد، وصورة إيصال المصاريف أو كارنيه السنة الدراسية الحالية أو السابقة.
مهم جدًا تكتب رقم موبايل الطالب أو ولي الأمر.. الاشتراك بيكون من محل السكن لمكان الدراسة فقط، وبيستخدمه صاحبه بس.. عشان تجنب أي غرامة مالية.. لو بتركب المترو كل يوم.. الاشتراك هيوفر عليك كتير.
