الطمع في "نقاط المكافآت" ممكن يخسرك فلوسك.. لو وصلك اللينك ده ماتفتحهوش
تجيلك رسالة على الموبايل تجري تفتحها تلاقيها بتقولك: "مبروك.. معاك نقاط مكافآت تقدر تستبدلها فورًا بهدية بـ 5000 جنيه.
تفرح؟.. ده طبيعي.. لكن استنى لحظة، لأن الهدية دي ممكن جدًا تكون الطريقة اللي هتخسر بيها كل فلوسك.
موضوع "نقاط المكافآت" بقى واحد من أحدث طرق النصب الإلكتروني، والفكرة بسيطة وإنت الضحية المثالية من غير ما تحس.
أي بنك بيحب تستخدم الكارت بتاعك دايمًا، كل ما تشتري أكتر، تجمع نقاط أكتر، النقاط دي تقدر تحولها لمشتريات، خصومات، أو حتى فلوس.
لحد هنا كله تمام، اللعبة بتبدأ لما يجيلك لينك في رسالة أو واتساب: "آخر فرصة تستبدل نقاطك".. "إلحق قبل ما النقاط تنتهي".
تدوس على اللينك، تلاقي صفحة شبه صفحة البنك بالمللي: نفس اللوجو، نفس الألوان، نفس الكلام، تحس إنك في المكان الصح بس الحقيقة؟، دي صفحة مضروبة 100%.
تدخل بياناتك عشان "تأكد استبدال النقاط"، رقم الكارت، تاريخ الانتهاء، والـ3 أرقام اللي ورا.
أول ما تكتبهم، تكون عمليًا سلمت الكارت للنصاب، وفي دقايق، تلاقي فلوسك بتتسحب أو الكارت بيتستخدم في مشتريات أونلاين، لا نقاط رجعت ولا فلوس فضلت.
طب بيوقعوك إزاي بسهولة كده بيستخدموا الاستعجال: 24 ساعة بس!
بيستخدموا الطمع المشروع: هدية مجانية.. وبيستخدموا الثقة: صفحة شبه الرسمية تخليك تطمن.
وخد بالك من أهم نقطة، استبدال النقاط الحقيقي عمره ما بيطلب منك تدخل بيانات الكارت من جديد، البنك عنده كل معلوماتك بالفعل.
طيب تحمي نفسك إزاي؟ ما تدخلش على صفحة من لينك جالك في رسالة، وادخل بنفسك على التطبيق أو الموقع الرسمي.
أي صفحة تطلب الـ3 أرقام اللي ورا الكارت عشان "نقاط"؟ اهرب فورًا.
لو شكيت إنك كتبت بياناتك في مكان غلط، كلم البنك فورًا واطلب إيقاف الكارت.
تواصل دايمًا مع خدمة العملاء من الرقم المكتوب على ضهر الكارت، مش من رقم اتبعتلك.
وخليك فاكر إن النصاب مش محتاج غير غلطة صغيرة منك، عشان ده متخليش "هدية وهمية" تكلفك تحويشة عمرك كله.
