الكيلو بـ110 جنيه.. ايه اللي بيحصل في سوق الفراخ؟
كيلو الفراخ بـ110 جنيه، الرقم لوحده كفيل يخلّي أي بيت مصري يقلق خصوصًا وإحنا داخلين على رمضان، الموسم اللي الطلب فيه بيزيد والأسعار بتحب تطلع.
عشان كده الناس كلها بتسأل هو الغلا ده حقيقي ولا دي إشاعة؟ الحقيقة إن الصورة أعقد شوية من مجرد إشاعة شعبة الدواجن نفسها خرجت ووضحت إن اللي بيحصل مش سببه الدولار ولا الأعلاف، بالعكس الأعلاف مستقرة من شهور طويلة، والذرة والصويا موجودين، ومفيش أزمة استيراد.
وقالت إن القصة بدأت من فترة لما أسعار الفراخ وقعت جامد، ووصلت لأرقام خلت المربين يخسروا خسارة تقيلة.
والنتيجة أن مربين كتير انسحبوا من السوق وبطلوا تربية، فالمعروض قل فجأة، والأسعار بدأت تطلع في حركة اسمها “تصحيح سعري”.
يعني السوق بيحاول يعوض اللي فات، بس على حساب المستهلك، حتى المنتجين نفسهم مش مبسوطين بالوضع الحالي، وبيقولوا إن الفراخ مينفعش تفضل لعبة عرض وطلب، لأنها أكل أساسي، خصوصًا بعد ما اللحمة بقت بعيدة عن ناس كتير.
بس.عموما الدولة دخلت تقلل الصدمة، وبدأت تطرح دواجن بأسعار أقل في المجمعات الاستهلاكية، مع كميات كبيرة من الفراخ المجمدة والمستوردة، تحسبًا لزيادة الطلب اللي ممكن توصل لـ30% في رمضان.
والرسالة الأهم إن التوقعات بتقول إن الأسعار مش هتعدي سقف 110 جنيه، وإنها ممكن تبدأ تهدى بعد أول أسبوع في رمضان لما السوق يظبط نفسه تاني.
