لو عاوز تفهم اللي بيحصل في سوق الدهب.. شوف التقرير ده
هو ايه اللي بيحصل في سوق الذهب وليه الاسعار مولعة بالشكل ده؟ وهل اللي بنشوفه دلوقتي حركة طبيعية ولا في حاجة تقيلة مستخبية؟ وهل صعود الدهب بالشكل الجنوني ده رسالة مبكرة عن ازمة مالية او نقدية جاية؟
اللي متابع اسواق المال العالمية هيلاحظ ان الذهب رجع يتصدر المشهد بقوة غير معتادة المعدن الاصفر اللي دايما بيظهر وقت القلق والخوف دلوقتي بيكسر ارقام تاريخية وبيجري بسرعة خلت المستثمرين قبل المحللين يقفوا يتفرجوا ويسألوا ايه اللي بيحصل وليه الذهب بيطلع بالوتيرة دي.
من تلات سنين بس كان الوصول لمستوى الفين دولار للاونصة حلم كبير واتحسب وقتها انه انجاز تاريخي لكن دلوقتي المشهد اتغير تماما الذهب عدى4 الاف دولار وقفز اكتر من500 دولار في شهر واحد وفي جلسة واحدة بس زاد اكتر من170 دولار وده رقم نادر الحدوث في سوق معروف عنه الهدوء النسبي.
الصعود السريع ده مش حركة طبيعية ولا صعود صحي ناتج عن طلب صناعي او استثماري تقليدي ده صعود نابع من خوف واضح وهروب جماعي من المخاطر المستثمرين مش داخلين الذهب طمعانين في مكسب سريع قد ما هما بيدوروا على ملاذ امن يحميهم من اللي جاي.
اول سبب ورا الصعود الجنوني للذهب هو تآكل الثقة في العملات الرئيسية العالم كله عايش مرحلة سياسات نقدية توسعية وضخ سيولة غير مسبوق وده اثر بشكل مباشر على القيمة الحقيقية للعملات ومع اي احساس ان القوة الشرائية بتتاكل بيبقى الذهب هو الخيار الطبيعي لحفظ القيمة.
السبب التاني مرتبط بتراجع اسعار الفايدة لما العائد على الادخار يبقى ضعيف والفايدة تفضل منخفضة لفترات طويلة المستثمر يبدأ يدور على اصل يحافظ على قيمته حتى لو مش بيدر عائد مباشر وهنا الذهب بيكسب جاذبية كبيرة.
السبب التالت هو شهية البنوك المركزية المفتوحة على شراء الذهب البنوك المركزية حول العالم بقالها فترة بتزود احتياطاتها من الذهب بشكل واضح وملفت وهي مش بتبص للسعر الحالي قد ما بتبص للحماية طويلة الاجل من صدمات نقدية او جيوسياسية محتملة.
السبب الرابع هو المخاطر المتزايدة في اسواق الاسهم الاسهم خصوصا في السوق الاميركي بتتداول عند تقييمات مرتفعة تاريخيا وده بيخلي اي خبر سلبي او تصحيح محتمل مصدر قلق كبير ويدفع المستثمرين يحولوا جزء من فلوسهم للذهب كتحوط.
السبب الخامس هو الزخم القوي نفسه تاريخيا لما الذهب يدخل موجة صعود قوية بيبقى صعب يوقف فجأة الزخم بيجذب سيولة جديدة ومستثمرين اكتر وده بيغذي الاتجاه الصاعد وبيخلي الحركة تستمر لفترة اطول.
وسط كل ده السؤال الكبير.. هل صعود الذهب بالشكل ده مجرد تحوط مؤقت ولا السوق بيستشرف ازمة مالية او نقدية جاية ؟
الحقيقة ان الذهب عمره ما طلع بالشكل ده من غير سبب وكل مرة حصل فيها صعود قوي كان وراه توترات كبيرة ظهرت نتائجها بعد كده.
الايام الجاية هتكون كاشفة اكتر لكن اللي اكيد ان اشارات الذهب دلوقتي صعب تتجاهلها والاسواق كلها واقفة تراقب لان المعدن الاصفر دايما بيبقى اول واحد يحس بالخطر قبل ما الكل يشوفه بوضوح.
