تطورات مهمة في المشروع اللي هيغير خريطة الساحل الشمالي.. إيه بيحصل في علم الروم؟
يا ترى ايه آخر تطورات مشروع علم الروم اللي هيغير خريطة الساحل الشمالي بالكامل؟.. والمشروع وصل لغاية فين لحد دلوفتي ؟ وهل هو مشروع سياحي بس ولا الموضوع أكبرمن كده بكتير؟
مصر أعلنت رسميا عن تطورات جديدة في مشروع علم الروم المشروع العملاق اللي بتطوره شركة الديار القطرية بالشراكة مع هيئة المجتمعات العمرانية وده معناه إن الكلام بقى تنفيذ على الأرض مش مجرد اتفاقيات أو خطط على الورق الدولة بدأت فعليا في التنفيذ وبدأت كمان تصرف تعويضات ملاك الأراضي وده مؤشر قوي إن المشروع دخل مرحلة الجد.
الموضوع اتناقش على أعلى مستوى في اجتماع برئاسة رئيس الوزراء لمتابعة ملفات وزارة الإسكان وكان مشروع علم الروم في قلب النقاش لأننا بنتكلم عن مشروع استثماري ضخم اتوقعت اتفاقيته في نوفمبر اللي فات بقيمة إجمالية وصلت لنحو 29.7 مليار دولار رقم لوحده كفيل يشرح حجم المشروع وأهميته.
شركة الديار القطرية دفعت 3.5 مليار دولار ثمن أرض مساحتها 4900 فدان على ساحل البحر المتوسط غير استثمار عيني ضخم بقيمة 26.2 مليار دولار مخصص لبناء المشروع نفسه وده بيعكس ثقة استثمارية كبيرة في السوق المصري وفي مستقبل الساحل الشمالي كمنطقة جذب عالمية مش موسمية.
التنفيذ ماشي بخطة زمنية واضحة والأراضي بتتسلم على مراحل مقسمة لثلاث مناطق أ ب ج ومعاها شغل رفع مساحي ودراسات فنية شغالة في كل حتة الدولة كمان خلصت جزء كبير من ملف التعويضات وده عنصر حساس جدا في أي مشروع بالحجم ده.
تم بالفعل صرف تعويضات أراضي المنطقة الشاطئية ضمن المنطقة أ بمساحة 130.5 فدان وكمان صرف تعويضات المنطقة ب بمساحة 790 فدان وتعويضات القطعة ج بمساحة 122 فدان وده معناه إن الدولة حسمت ملف كان دايما بيأخر المشروعات الكبيرة.
على مستوى التنفيذ الفني الجسات اتاخدت وتصميم الطرق خلص وجاري مراجعته داخل هيئة المجتمعات العمرانية والشغل ماشي بوتيرة سريعة مش كلام بيانات وخلاص لكن معدات وشغل على الأرض.
كمان بدأ التنفيذ في منطقة السكن البديل بالغابة الشجرية وتم عرض المخطط الهيكلي والتفصيلي لمنطقة التعويضات وده بيأكد إن المشروع مش بس استثمار عقاري لكنه تنمية عمرانية متكاملة بتحاول توازن بين التطوير وحقوق الأهالي.
علم الروم مش مجرد قرية سياحية جديدة المشروع جزء من رؤية أوسع لتحويل الساحل الشمالي لوجهة عالمية طول السنة تعتمد على مدن متكاملة وخدمات وبنية تحتية حديثة وشراكات دولية قوية.
الدولة من خلال الشراكة دي بتبعث رسالة واضحة إن مصر منفتحة على الاستثمارات الضخمة طويلة الأجل وإنها مستعدة تشتغل بنظام الشراكة الحقيقي اللي يحقق مكسب لكل الأطراف.
اللي جاي في مشروع علم الروم هيكون علامة فارقة لأننا بنتكلم عن مشروع هيغير شكل المنطقة ويخلق فرص عمل ويجذب عملة صعبة ويعيد تعريف الاستثمار العقاري في مصر بصورة أعمق وأشمل من أي وقت فات.
