لو جتلك شقة الإسكان.. دي أهم خطوة لازم تعملها قبل الاستلام
لو خلاص جتلك شقة الإسكان الاجتماعي.. لازم تعرف إن فيه خطوة مهمة جدا لازم تعملها قبل الاستلام.
محضر استلام شقة الإسكان.. ده أهم ورقة قبل ما تستلم وتسكن.
يعني لو جالك ميعاد استلام شقة الإسكان الاجتماعي أو سكن لكل المصريين.. ما تستعجلش التوقيع.. محضر الاستلام هو اللي بيحفظ حقك بعد كده.
أولا حقوقك ايه.. من حقك تراجع الشقة كويس جدا.. تتأكد إن الأبواب والشبابيك سليمة، الحيطان والأرضيات مفيهاش مشاكل التشطيب مقبول، والسباكة شغالة، والكهربا مظبوطة.
لازم كمان تتأكد إن العدادات موجودة، كهربا، ومياه، غاز لو متوفر.. أي عيب تشوفه صغير أو كبير من حقك يتكتب في محضر الاستلام ومهم جدا يتحدد ميعاد لإصلاحه.
من حقك تستلم نسخة رسمية من محضر الاستلام.. واحتفظ بيها كويس.. دي الورقة اللي بتثبت إنك استلمت الشقة بالحالة دي.
ولو فيه عيوب جوهرية، من حقك ترفض الاستلام، وفي الحالة دي بيتحدد ميعاد جديد بعد ما يتم الإصلاح.
يعني راجع وسجل ملاحظاتك وخد نسختك.. علشان تستلم شقتك وانت مطمن وحقك محفوظ.
