استنى بلاش تشتري دلوقتي.. تراجع 30% في أسعار الشقق
بعد سنتين من ارتفاعات غير منطقية في أسعار العقارات خلت حلم التملك صعب على ناس كتير.
السوق العقاري في مصر داخل في 2026 وهو مستني تصحيح قوي ممكن يغير خريطة الأسعار بالكامل.
خبراء كتير شايفين ان الفقاعة اللي اتكونت بسبب تسعير العقار على دولار مبالغ فيه بدأت تضعف.
والدليل ان الدولار التحوطي اللي كان بيتحسب على 100 و120 جنيه اختفى والدولار الواقعي دلوقتي حوالين 47 جنيه.
كمان تكلفة البناء نفسها بتتراجع طن الحديد نزل من حوالي 50 الف جنيه لقرابة 38 الف وده بيخلي الاسعار القديمة صعب تفضل زي ما هي.
غير كده الفايدة اتخفضت بشكل كبير في 2025 والتوقعات انها تنزل اكتر في 2026 وده معناه تكلفة تمويل اقل على المطورين بعد ما كانت الفايدة لوحدها بتمثل جزء كبير من تكلفة المشروع.
السوق كمان بقى فيه تشبع.. ناس كتير كانت شارية عقار كتحوط من التضخم وبدأت دلوقتي تبيع عشان تجني مكسب فالمعروض زاد وضغط على الاسعار.
وده باين في ارقام المبيعات.. مبيعات اكبر مطورين نزلت حوالي 30% وخصوصا في العقارات الفاخرة.
الخبر المهم للمشتري الجديد ان في شركات بدأت فعلا تطرح وحدات باسعار اقل من السنة اللي فاتت بنسبة وصلت 18%.. والتوقعات ان الانخفاض يوصل 30% مع نهاية 2026.
