قرار مفاجئ من الإسكان الاجتماعي.. شقتك ممكن تفك حظر ومش لازم تستنى 7 سنين
لو معاك شقة إسكان اجتماعي وكنت فاكر إنك مربوط بيها سنين وممنوع تبيع أو تتصرف… الخبر ده هيهمك جدا.. صندوق الإسكان الاجتماعي أعلن قرار جديد ممكن يغير حسابات ناس كتير.. خليك معايا.
صندوق الإسكان الاجتماعي وافق رسميًا على قبول طلبات السداد المعجل حتى قبل انتهاء فترة حظر التصرف، بشرط إن الشقة يكون مر على استلامها أكتر من 3 سنين.
بس خد بالك لازم تقدم طلب، وتدفع 5 آلاف جنيه رسوم.. والفلوس دي مش بتترجع، لكن لو الطلب اتقبل، بتتخصم من المبلغ النهائي. قيمة السداد بتختلف حسب مدة استلام الشقة:
من 3 لـ 4 سنين بتدفع 50% من فرق السعر
من 4 لـ 6 سنين بتدفع 40%
من 6 لـ 7 سنين بتدفع 30%
حتى اللي عليهم مخالفات بيع أو محاضر يقدروا يقدموا تصالح بس بيدفعوا 80% من فرق السعر، وده لو المخالفة حصلت قبل 3 سنين.. الخبر الحلو بقى الصندوق أطلق خدمتين أونلاين:
الأولى: تقديم طلب السداد المعجل أو التصالح.
والتانية: الاستعلام عن حالة الطلب.
وكله إلكتروني.. من غير زحمة .. وومن غير تعامل مباشر، وشفافية كاملة. بس افتكر.. لازم تكون مسدد كل أقساطك للبنك الأول، وتحصل على مخالصة نهائية.
