لو عايز التموين لوحدك.. ازاي تفصل نفسك من البطاقة؟
عايز تطلع بطاقة تموين لوحدك من غير لف ولا دوشة دلوقتي الموضوع بقى أسهل وأسرع أونلاين.. وزارة التموين وفرت خدمة جديدة على منصة مصر الرقمية تخلّيك تفصل نفسك من بطاقة التموين القديمة وتطلع بطاقة مستقلة وانت في بيتك، ضمن خطة الدولة لتحويل الخدمات للرقمنة وتسهيل الإجراءات على المواطنين.
الخدمة متاحة لأي مستفيد مش رب أسرة، بشرط يكون مستحق للدعم التمويني، وكل اللي عليك تدخل على منصة مصر الرقمية، تختار خدمات التموين، تضغط على خدمة «فصل نفسي»، وتكمل بياناتك بكل سهولة.
ولو محتاج بطاقة تموين جديدة، بتقدم طلب في مكتب التموين التابع ليك، ومعاه صورة بطاقة الرقم القومي، وشهادات الميلاد أو بطاقات أفراد الأسرة، ومستند يثبت أحقيتك للدعم.
وخلال أسبوعين بس، الطلب بيتراجع، والبطاقة الذكية بتتطبع، وتوصلك على مكتب التموين، وتستلم الرقم السري وتفعلها فورًا.. يعني لا طوابير طويلة ولا مشاوير كتير خطوات بسيطة وخدمة أسرع لكل اللي عايز حقه في الدعم التمويني.
