باستثمارات 271.1 مليون دولار.. مصر تعتمد 10 مشروعات جديدة في المنطقة الاقتصادية لقناة السويس
إيه دلالات اعتماد 10 مشروعات جديدة دفعة واحدة في المنطقة الاقتصادية لقناة السويس؟، وليه المنطقة الاقتصادية بقت وجهة مفضلة للاستثمارات الأجنبية في الفترة الأخيرة؟، وهل تركيز 9 مشروعات على المنسوجات والملابس الجاهزة خطوة ذكية لدعم التصدير؟، وإزاي 271 مليون دولار استثمارات جديدة هتنعكس على سوق العمل وتوفير فرص شغل حقيقية؟، وإيه سر النجاح الكبير لمنطقة القنطرة غرب في جذب مصانع الغزل والنسيج؟.
اللي بيحصل دلوقتي في المنطقة الاقتصادية لقناة السويس بقى واضح إنه مش مجرد وعود أو خطط على الورق، ده شغل تقيل بيترجم لأرقام ومشروعات وفرص عمل حقيقية.. الحكومة أعلنت رسميًا اعتماد 10 مشروعات جديدة جوه المنطقة الاقتصادية، باستثمارات وصلت لـ 271.1 مليون دولار، والرقم الأهم هنا مش الفلوس بس، لكن أكتر من 14 ألف فرصة عمل مباشرة هتدخل السوق في فترة قريبة.
المشروعات دي متقسمة بشكل مدروس، لأن الدولة بتركز على الصناعات اللي تشغّل ناس كتير وتدخل عملة صعبة.. 9 مشروعات منهم في منطقة القنطرة غرب الصناعية، ودي منطقة بقت واحدة من أهم مراكز صناعة الغزل والنسيج والملابس الجاهزة في مصر.. المشروعات دي لوحدها باستثمارات 225.1 مليون دولار، وهتوفر حوالي 13 ألف و900 فرصة عمل، يعني تقريبًا مدينة صغيرة شغالة إنتاج وتصدير.
القصة هنا مش مجرد مصانع هدوم وخلاص، دي سلاسل قيمة كاملة، من الغزل، للنسيج، للتفصيل، وكمان إعادة تدوير البلاستيك، وده مهم جدًا لأنه بيجمع بين الصناعة والتشغيل والحفاظ على البيئة في نفس الوقت.. يعني شغل عصري ماشي مع اللي العالم كله رايح له.
أما المشروع العاشر، فموجود في منطقة شرق الإسماعيلية الصناعية، وده في قطاع الصناعات المعدنية، باستثمارات حوالي 16 مليون دولار، وهيوفر قرابة 150 فرصة عمل مباشرة. يمكن الرقم أقل من ناحية العمالة، لكن النوعية هنا مهمة، لأن الصناعات المعدنية دايمًا بتخدم صناعات تانية وبتزود القيمة المضافة.
المشروعات دي اعتمدت خلال اجتماع مجلس إدارة الهيئة العامة للمنطقة الاقتصادية لقناة السويس للعام المالي 2025/2026، بحضور وزراء مهمين ومحافظين ورجال صناعة واستثمار، وده بيديك إحساس أن الملف ده شغال على أعلى مستوى، ومش قرار عشوائي.
ولو بصينا للصورة الأكبر، هنفهم أن الـ10 مشروعات دول جزء من مسار طويل. المنطقة الاقتصادية لقناة السويس قدرت خلال آخر 3 سنين تجذب 383 مشروع باستثمارات وصلت لـ 14.21 مليار دولار، ووفرت أكتر من 134 ألف فرصة عمل مباشرة.. أغلب المشروعات دي كانت في المناطق الصناعية، والباقي في المواني، وده بيخلق تكامل بين التصنيع والتصدير.
الأرقام كمان بتقول إن النص الأول بس من السنة المالية الحالية 25-26 شهد جذب 80 مشروع جديد باستثمارات أكتر من 5.1 مليار دولار، يعني أكتر من اللي اتحقق في سنة كاملة قبل كده، وده معناه أن المنطقة الاقتصادية بقت نقطة جذب حقيقية للمستثمرين من كل حتة.
يعني من الآخر، أن اللي بيحصل في المنطقة الاقتصادية لقناة السويس مش صدفة، دي سياسة واضحة، وكل مشروع جديد معناه شغل لناس أكتر، وحركة اقتصادية أكبر، وخطوة جديدة في اتجاه إن مصر تبقى مركز صناعي ولوجستي مهم في المنطقة.
