انفراجة مهم في أزمة الدولار.. ضربات المركزي خلصت الكلام
يا ترى ايه أسباب زيادة الاحتياطي النقدي للبنك المركزي؟ وايه أهمية الزيادة دي وتاثير على توافر سيولة دولارية؟ والأهم ايه الخطوات اللي خدها البنك المركزي وساهمت في الزيادة الكبيرة بعدما كان الاحتياطي بيتآكل؟
الاحتياطي النقدي لما يزيد بالشكل الكبير اللي شفناه مؤخرا ده معناه إن الدولة بقى عندها رصيد أقوى من العملات الأجنبية تقدر تواجه بيه أي صدمات وتغطي بيه احتياجاتها من الاستيراد وتسدد التزاماتها الخارجية من غير توتر ولا استعجال وده في حد ذاته عنصر أمان كبير لأي اقتصاد خصوصا اقتصاد بحجم مصر.
واحدة من أهم الأسباب اللي رفعت الاحتياطي بالشكل ده هي تحويلات المصريين العاملين بالخارج واللي حققت طفرة غير مسبوقة خلال الفترة من يناير لحد نوفمبر 2025 التحويلات دي زادت بنسبة اتنين واربعين فاصلة خمسة في المية وسجلت حوالي سبعة وتلاتين ونص مليار دولار بعد ما كانت حوالي ستة وعشرين فاصلة تلاتة مليار دولار في نفس الفترة من السنة اللي قبلها وده رقم تاريخي بمعنى الكلمة.
وعلى المستوى الشهري الصورة كانت أوضح في شهر نوفمبر 2025 لوحده التحويلات سجلت حوالي تلاتة فاصلة ستة مليار دولار مقارنة بحوالي اتنين فاصلة ستة مليار دولار في نوفمبر 2024 وده بيأكد إن التدفقات الدولارية بقت منتظمة ومستقرة ومش ضربة حظ ولا ظرف مؤقت.
كمان البيانات بتقول إن أول عشرة شهور من السنة شهدوا تحويلات وصلت لحوالي تلاتة وتلاتين فاصلة تسعة مليار دولار مقابل تلاتة وعشرين فاصلة سبعة مليار دولار في نفس الفترة من السنة اللي فاتت وده معناه إن البنك المركزي بقى عنده مصدر دولاري ثابت داخل بقوة في الاحتياطي.
طيب ايه اللي عمله البنك المركزي عشان يوصل للنقطة دي؟
أول حاجة الثقة لما يكون في سياسة نقدية واضحة وسعر صرف مرن وسوق رسمي شغال من غير تشوهات الناس برا بترتاح وتحول فلوسها من القنوات الرسمية بدل السوق الموازية وده اللي حصل بالفعل.
تاني حاجة إدارة ذكية لسوق الصرف البنك المركزي قدر يوازن بين العرض والطلب من غير ما يحرق احتياطيه ولا يضغط على الجنيه بشكل مصطنع وده خلا السوق هادي والدولار متاح من غير هلع.
تالت حاجة التنسيق مع الحكومة في ملف الاستثمارات والتدفقات الأجنبية سواء استثمارات مباشرة أو غير مباشرة وكل ده ساهم في دعم الاحتياطي ورفع مستواه.
طيب الزيادة دي تأثيرها ايه على الدولار؟
التأثير المباشر إن توافر الدولار بيزيد والبنوك تبقى أريح في تلبية طلبات الاستيراد وده يقلل الضغط على السعر ويمنع أي قفزات مفاجئة ويدي رسالة طمأنة للسوق إن مفيش أزمة سيولة.
لكن الأهم من كده إن الاحتياطي القوي بيدي قوة تفاوضية للدولة في أي التزامات خارجية ويخليها تتحرك بثقة أكبر في القرارات الاقتصادية من غير ما تبقى تحت ضغط العملة.
فاللي بيحصل مش رقم بيتعلن في بيان وخلاص دي نتيجة شغل طويل وسياسات محسوبة وتأثيرها هيبان أكتر في الفترة الجاية في استقرار السوق وتوافر الدولار وتحسن الثقة واللي جاي هيكون انعكاس طبيعي لكل الخطوات اللي اتاخدت صح في وقت صعب.
