مفاجآت الجنيه في 2026.. معركة العملة المصرية مع الدوﻻر
هو الجنيه بعد اللي عمله في 2025 لسه قدامه مكاسب ولا اللي فات كان استثناء؟ وهل استقرار الدولار دلوقتي معناه بداية قوة حقيقية ولا مجرد هدوء مؤقت؟ وهل 2026 هتكون سنة تثبيت ولا سنة صعود جديد للجنيه؟
الجنيه المصري بدأ 2026 بهدوء وثبات قدام الدولار وده بعد سنة كانت من أقوى السنين في تاريخه الحديث لما حقق مكاسب واضحة وقدر يقفل 2025 بارتفاع حوالي 6.7 في المية قدام العملة الأمريكية وده رقم ماكانش سهل يتحقق خصوصا بعد سنين من الضغوط والتخفيضات المتتالية.
مع أول أيام السنة الجديدة أسعار الدولار في البنوك كانت شبه ثابتة البنك المركزي سجل 47.60 جنيه للشراء و47.74 للبيع والبنوك الكبرى كلها بتتحرك في نفس النطاق ما بين 47.50 و47.68 وده بيدينا إشارة إن السوق مش تحت ضغط وإن في توازن واضح بين العرض والطلب.
السؤال الحقيقي هنا الجنيه استمد قوته منين؟ وليه التوقعات رايحة إن 2026 ممكن تكون امتداد للمكاسب مش مجرد توقف مؤقت؟
السبب الأول واللي محدش يقدر يتجاهله هو الزيادة الكبيرة في الموارد الدولارية وتحول الصورة تماما من نقص شديد في الدولار لوفرة نسبية في السيولة.
تحويلات المصريين في الخارج سجلت قفزة تاريخية في 2025 ووصلت لـ33.9 مليار دولار في أول عشرة شهور بس وده بزيادة تقرب من 43 في المية ورا الرقم ده في ثقة رجعت وفي سعر صرف بقى واقعي وفي قنوات رسمية بقت جاذبة أكتر من السوق الموازي.
كمان الاحتياطي النقدي وصل لمستوى قياسي عند 50.215 مليار دولار في نوفمبر وده رقم بيدي أمان كبير للبنك المركزي وقدرة أعلى على إدارة السوق من غير ضغط أو قرارات مفاجئة.
قطاع البنوك نفسه شهد تعافي قوي صافي الأصول الأجنبية وصل لـ22.7 مليار دولار بنهاية أكتوبر بعد ما كان في المنطقة السالبة لفترة طويلة وده معناه إن الجهاز المصرفي رجع قوي وقادر يمول ويدعم الاقتصاد.
طب هل في مخاطر؟ طبعا في عوامل لازم تتحط في الحساب زي توترات البحر الأحمر واللي أثرت على إيرادات قناة السويس وخفضتها لـ3.6 مليار دولار في السنة المالية 2024 2025 لكن التقديرات بتقول إن في تعافي تدريجي متوقع ومع رجوع الملاحة الإيرادات ممكن توصل لـ5.5 مليار دولار في 2026 2027.
النقطة المهمة إن الجنيه دلوقتي مش واقف على رجل واحدة..فيه تحويلات.. فيه احتياطي قوي.. وفيه بنوك مستقرة.. وفيه سياسة نقدية أكتر هدوء وواقعية.
كل ده بيخلي 2026 أقرب لسنة تثبيت مكاسب مع احتمالات تحسن تدريجي مش قفزات مفاجئة ولا تراجعات عنيفة.. الجنيه داخل السنة الجديدة وهو في وضع أقوى بكتير من أي سنة فاتت من 2016 لحد 2024.
اللي هيحصل في 2026 بنسبة كبيرة هو إدارة ذكية للمكاسب.. لا اندفاع.. ولا تعويم جديد.. ولا صدمات.. سوق الصرف داخل مرحلة جديدة اسمها الاستقرار الإيجابي.
وده معناه إن الجنيه ممكن يتحرك لكن في نطاقات ضيقة محسوبة.. ومع كل دولار جديد داخل البلد سواء من استثمار أو تحويلات أو سياحة الجنيه بيكسب أرضية جديدة.
