زيادة جديدة في إنتاج الغاز.. خبر سعيد مع بداية 2026.. وميزة جديدة داخل انستاباي
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، زيادة جديدة في إنتاج الغاز، وخبر سعيد في بداية 2026، وميزة جديدة في انستاباي.
والبداية من خبر مهم في قطاع الطاقة .. شركة أباتشي الأمريكية بتستعد تزود إنتاجها من الغاز الطبيعي في مصر بحوالي اربعين مليون قدم مكعب يوميا وده عن طريق ربط تلات آبار جديدة تابعين لمناطق امتيازها في الصحراء الغربية على الشبكة القومية للغاز وده من المتوقع يحصل مع نص شهر يناير الحالي والخطوة دي هتساعد بشكل واضح في تقليل الفجوة بين الإنتاج المحلي والطلب المتزايد على الطاقة.
مصدر حكومي قال إن تكلفة حفر التلات آبار دول بتوصل لحوالي خمسة وعشرين مليون دولار موضح إن الآبار دي مش بس فيها غاز طبيعي لكن كمان فيها كميات من النفط الخام.
وأضاف المصدر إن أباتشي كانت بالفعل قدرت خلال شهر ديسمبر اللي فات تربط خمس آبار جديدة على الشبكة القومية للغاز الطبيعي بطاقة إنتاجية وصلت لحوالي خمسة وستين مليون قدم مكعب غاز يوميا.
ونشاط الشركة الأمريكية مركز بشكل أساسي في مناطق امتياز النفط والغاز في الصحراء الغربية وده من خلال شركة خالدة للبترول اللي هي مشروع مشترك بينها وبين الهيئة المصرية العامة للبترول.
ونروح لخبر سعيد مع بداية 2026 حيث وزير المالية أحمد كجوك قال إن دين أجهزة الموازنة المصرية للناتج المحلي الإجمالي تراجع فعلا خلال سنتين بنسبة حوالي اتناشر في المية في الوقت اللي متوسط الدين للناتج في الدول الناشئة زاد بنسبة تسعة في المية.
كجوك أوضح في بيان إن الدين الخارجي لأجهزة الموازنة المصرية انخفض بحوالي اربعة مليار دولار خلال سنتين وأكد إن الحكومة مهتمة بكل فكرة وكل مقترح بيتقال وإن جزء كبير من المقترحات دي بيتنفذ بالفعل على أرض الواقع.
وشدد على إن الحكومة شغالة على تحقيق خفض كبير ومؤثر في مؤشرات الدين وده من خلال تنمية الموارد ودفع عجلة الاقتصاد مع الحفاظ على الانضباط المالي واستخدام أدوات تمويل مختلفة وكمان الاعتماد على إيرادات استثنائية.
وأشار كمان إن مصر نفذت اربعتاشر إصلاح هيكلي ضمن برنامج الإصلاح المدعوم من صندوق النقد الدولي وده بيعكس جدية الدولة في تحفيز النشاط الاقتصادي وتقوية دور القطاع الخاص.
وكمان قال إن وزارة المالية بتشتغل بالتنسيق مع وزير الاستثمار على تلاتين إجراء هدفهم تقليل زمن وتكلفة الإفراج الجمركي ودعم الصناعة الوطنية والحد من التهريب.
ونروح لخبر مهم في القطاع المصرفي حيث تطبيق إنستاباي للمعاملات البنكية والتحويلات اللحظية أطلق ميزة جديدة بتسهل على المستخدمين يعرفوا حدود التحويل اليومية والشهرية مباشرة من خلال التطبيق نفسه وده بيوفر تجربة أسرع وأكثر أمان في إدارة الفلوس.
التطبيق أوضح عبر صفحته الرسمية على فيسبوك إن الميزة الجديدة بتخلي العميل يقدر يتابع حدود التحويل في ثواني من غير ما يحتاج يكلم خدمة العملاء أو يروح أي فرع وده بيخلي عمليات التحويل أوضح وأسهل.
والخطوة دي بتيجي ضمن سلسلة تحديثات بيعملها إنستاباي علشان يحسن تجربة المستخدمين ويوفر أدوات تحكم أفضل في عمليات التحويل بما يتماشى مع توجه القطاع المصرفي ناحية الخدمات الرقمية السريعة والآمنة.
ونختم من وزارة الصناعة المصرية اللي أعلنت عن حزمة جديدة من المهل والتيسيرات للمشروعات الصناعية المتعثرة اللي عدت المدد الزمنية المقررة ليها.
الوزارة قالت في بيان إن التيسيرات دي جاية في إطار حرصها على الحفاظ على مصالح المصنعين ومساعدة المصانع الجادة اللي عايزة ترجع تشغل وتدور عجلة الإنتاج وأكدت إن المهل والتيسيرات دي هتتطبق من خلال الهيئة العامة للتنمية الصناعية لحد تلاتين ابريل 2026.
والتيسيرات بتشمل منح مهلة ست شهور للمشروعات اللي حصلت على رخصة بناء ونفذت نسبة بنائية أكتر من خمسة وسبعين في المية من الرخصة مع إعفائها من كل غرامات التأخير وده علشان تقدر تستكمل التنفيذ وتوفر الآلات والمعدات اللازمة للتشغيل وكمان تخلص رخصة التشغيل والسجل الصناعي خلال فترة المهلة الممنوحة.
