الدهب رايح على فين؟.. هنقولك سر اللي بيحصل في الصاغة
هو ايه اللى بيحصل في سوق الدهب بالظبط ؟ وليه كل يوم الدهب بسعر مختلف ؟ والأهم أسعار الدهب رايحة على فين؟ وهل اللي بيحصل في السوق ده طبيعي ولا في حاجة أكبر بتحصل؟
اللي حصل في آخر يومين إن أسعار الدهب اتحركت في نطاق ضيق لكن بحركة سريعة طالع شوية ونازل شوية وده خلق إحساس بعدم الاستقرار لكن الحقيقة إن اللي بنشوفه ده انعكاس طبيعي لحالة ترقب كبيرة في السوق العالمي قبل ما تكون محلية لأن الدهب في الأساس بيتسعر عالميا ومصر بتتأثر باللي بيحصل بره بشكل مباشر.
أول سبب واضح للتذبذب هو إن المستثمرين الكبار في العالم بقوا حذرين جدا وبيقللوا مراكزهم شوية ويزودوها شوية حسب الأخبار اللي بتطلع من أمريكا خصوصا المتعلقة بأسعار الفايدة والتضخم والاقتصاد بشكل عام أي تصريح أو توقع جديد بيخلي الدهب يتحرك بسرعة لأن المعدن الأصفر دايما حساس جدا لأي تغيير في السياسة النقدية.
السبب التاني مرتبط بحركة الدولار لأن العلاقة بين الدهب والدولار عكسية وكل ما الدولار يقوى شوية الدهب يهدى وكل ما الدولار يضعف الدهب يسخن وفي آخر يومين شفنا الدولار نفسه متردد مش طالع بقوة ولا نازل بقوة وده انعكس مباشرة على سعر الدهب سواء عالميا أو في السوق المصري.
أما محليا ففيه عامل العرض والطلب اللي ماينفعش نغفله خالص لأن مع أي حركة في السعر بيحصل اندفاع من شريحة من الناس للشراء وشريحة تانية للبيع وده بيزود التذبذب خصوصا مع قلة السيولة أحيانا أو انتظار التجار لاتجاه أوضح للسوق.
طيب الأيام الجاية شكلها ايه التوقعات بتقول إن حالة التذبذب ممكن تكمل شوية لكن في اتجاه عام مايل للصعود طالما مفيش قرار حاسم برفع قوي للفوايد الأمريكية وطالما التوترات العالمية لسه موجودة لأن الدهب في الظروف دي بيحتفظ بجاذبيته كملاذ آمن.
في نفس الوقت لازم ناخد بالنا إن أي إشارات تهدئة في الاقتصاد العالمي أو تفاؤل زيادة عن اللزوم ممكن تخلي الدهب يلتقط أنفاسه وينزل تصحيح بسيط وده طبيعي وصحي للسوق ومش معناه انهيار ولا حاجة.
المؤكد إن اللي بيحصل في أسعار الدهب دلوقتي هو انعكاس لحالة ترقب عالمية أكتر منه أزمة محلية والتذبذب ده جزء من طبيعة السوق في الفترات اللي بتسبق قرارات مهمة واللي بيفكر على المدى المتوسط والطويل بيبص للصورة الكبيرة مش لحركة يوم ولا يومين والدهب طول عمره بيدي إشارات قبل ما يتحرك حركة كبيرة والسوق حاليا في مرحلة انتظار وترقب واللي جاي هيكون أوضح مع أي خبر جديد مؤثر على المشهد العالمي.
