المركزي يسحب سيولة جديدة.. مصر تتسلم 3.5 مليار دولار.. وواردات مصر من القمح تسجل قفزة تاريخية
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، المركزي يسحب سيولة جديدة، ومصر تتسلم 3.5 مليار دولار، وواردات مصر من القمح تسجل قفزة تاريخية.
والبداية من البنك المركزي اللي سحب سيولة بحوالي 62.9 مليار جنيه النهارده من خمس بنوك من خلال عطاء السوق المفتوحة وبسعر فايدة وصل لـ 20.5 في المية وده حسب اللي اتنشر على الموقع الرسمي للبنك.
الخطوة دي بتيجي بعد ايام قليلة من قرار لجنة السياسة النقدية في البنك المركزي المصري بخفض سعر الفايدة على الإيداع والإقراض وكمان سعر العملية الرئيسية للبنك بمقدار 100 نقطة اساس في اخر اجتماعات البنك خلال سنة 2025.
التحرك ده جزء من السياسة النقدية للبنك المركزي واللي هدفها الاساسي إدارة فائض السيولة جوه الجهاز المصرفي وضبط مستويات الفايدة بالشكل اللي يخدم اهداف السياسة النقدية ويحافظ على التوازن في السوق.
وكان البنك المركزي قبل كده اصدر تعليمات جديدة بتنظم العملية الرئيسية لربط الودائع واللي بتتم من خلال مزادات اسبوعية بسعر ثابت البنك بيعلن فيها حجم العملية مسبقا وبعد كده بيتم قبول العطاءات حسب نسبة مشاركة كل بنك ويتطبق عليهم سعر العملية الرئيسي.
ونروح لخبر مهم حيث مصر استلمت النهارده 3.5 مليار دولار ضمن صفقة تطوير منطقة سملا وعلم الروم في الساحل الشمالي الغربي وده بحسب وكالة رويترز.
الاستثمارات الاجنبية المباشرة الكبيرة اللي مصر قدرت تجذبها من بداية السنة الحالية خلت الحكومة ترفع سقف طموحاتها بخصوص الاستثمار الاجنبي المباشر في الفترة اللي جاية وده حسب تصريحات مسؤول حكومي.
المسؤول كمان اوضح ان الحكومة دلوقتي مش مركزة على ارقام او مستهدفات محددة للاستثمار الاجنبي المباشر قد ما بتركز على جذب شركات وانشطة من قطاعات معينة للسوق المصري بما يخدم خطط التنمية.
ونروح لواردات مصر من القمح اللي سجلت تاني اعلى مستوى تاريخي ليها مع نهاية السنة الحالية رغم انخفاضها بنسبة 12.7 في المية على اساس سنوي.
البيانات وضحت ان اجمالي واردات القمح خلال السنة الحالية وصل لحوالي 12.3 مليون طن مقارنة بنحو 14.1 مليون طن السنة اللي فاتت واللي كانت اعلى مستوى واردات تاريخي سجلته مصر للقمح.
وبرغم كده واردات السنة الحالية جاية اعلى من المتوسط العام لواردات القمح خلال اخر 6 سنين بنسبة حوالي 8.8 في المية واللي كان متوسطه تقريبا 11.3 مليون طن.
ونختم من البنك المركزي اللي وقع مع بنك التصدير والاستيراد الافريقي افريكسيم بنك مذكرة تفاهم علشان يتم انشاء بنك متخصص في الذهب على مستوى قارة افريقيا.
المبادرة دي هدفها تقوية احتياطيات البنوك المركزية وتقليل الاعتماد على مراكز تكرير وتداول الذهب خارج افريقيا وكمان تنظيم صناعة وتجارة الذهب بشكل رسمي جوه القارة.
وبحسب مذكرة التفاهم الجانبين هيشتغلوا على دراسة جدوى كاملة علشان تقييم كل الجوانب الفنية والتجارية والتنظيمية لإنشاء منظومة متكاملة لبنك الذهب في واحدة من المناطق الحرة المخصصة في مصر وتشمل مصفاة ذهب معتمدة دوليا ومخازن امنة لتخزين الذهب وكمان خدمات مالية وتداول متطورة مرتبطة بالذهب.
وقال البنك في بيان صادر يوم الثلاثاء ان انشاء بنك متخصص في الذهب ماشي مع رؤية الدولة المصرية اللي بتهدف لتوسيع الشراكات الاستراتيجية وتعزيز التعاون مع الدول الافريقية في مختلف المجالات وكمان مع توجه افريكسيم بنك لتعزيز القيمة المضافة والمعالجة الاستراتيجية للمعادن داخل القارة.
