تحرك طفيف في سعر الدولار.. هل الأمور تحت السيطرة؟
هو الدولار ليه اتحرك تاني بعد فترة هدوء؟ وهل اللي بيحصل ده طبيعي ولا جرس إنذار ؟ وهل اللى بيحصل طبيعي في ظل تطبيق سياسة صرف مرنة ولا فيه اي قلق في الموضوع؟ الاسئلة دي وغيرها بقت بتتكرر مع كل تحرك بسيط في سعر الدولار خصوصا بعد ما شفنا العملة الامريكية تخترق مستويات قريبة من 47 جنيه و70 قرش وبتتحرك في نطاقات ضيقة لكنها ملفتة للانتباه.
اللي حاصل في سوق الصرف خلال الايام الاخيرة تحرك طفيف لكنه منطقي جدا في سياق اقتصادي اوسع الجنيه كان محقق اطول موجة مكاسب نسبية الفترة اللي فاتت ومع اي سوق مالي طبيعي لازم يحصل تصحيح وده معناه ان الدولار لما يطلع شوية بعد نزول مش بالضرورة يكون اتجاه جديد ولا صدمة جاية لكنه في اغلب الاحيان بيبقى نتيجة توازنات عرض وطلب مؤقتة خصوصا مع ترقب المستثمرين والمستوردين لاي اخبار جديدة.
السوق حاليا متأثر بعدة عوامل في نفس الوقت منها انتظار قرارات نهائية مرتبطة ببرنامج التمويل الدولي وده بيخلي بعض اللاعبين في السوق ياخدوا وضع المراقبة او يعيدوا ترتيب مراكزهم وده بيظهر في تحركات سعر الصرف على نطاق ضيق الدولار اتحرك لكن من غير قفزات عنيفة وده مهم جدا لان التحركات العنيفة هي اللي بتبقى مقلقة انما اللي بيحصل دلوقتي اقرب لحالة جس نبض.
في نفس الوقت المؤشرات الاقتصادية الكلية بتقول ان الصورة العامة مستقرة نسبيا النمو الاقتصادي سجل تحسن واضح ووصل لمعدلات اعلى من السنة اللي فاتت مدفوع بقطاعات انتاجية وخدمية حقيقية زي الصناعة غير النفطية والنقل والسياحة والخدمات المالية ده غير تحسن ميزان المدفوعات وانخفاض عجز الحساب الجاري نتيجة زيادة تحويلات المصريين في الخارج وارتفاع ايرادات السياحة وكل دي عوامل بتدعم الجنيه على المدى المتوسط.
كمان مهم نفهم ان السياسة النقدية مازالت حذرة البنك المركزي ماشي بنهج متوازن بيحاول من خلاله يسيطر على التضخم وفي نفس الوقت ما يخنقش النمو خفض الفايدة اللي حصل بواقع 100 نقطة اساس كان متوقع وجاي بعد سلسلة تخفيضات محسوبة وده بيدي اشارة ان صانع السياسة النقدية شايف ان التضخم بقى تحت السيطرة نسبيا وده بيقلل الضغط على الجنيه على المدى الاطول.
الدولار كمان بيتأثر بحركة الاموال الساخنة واستثمارات الاجانب في ادوات الدين واللي وصلت لمستويات قوية وده عنصر دعم مهم لسوق الصرف وبيزود المعروض من العملة الصعبة ومع ارتفاع الاحتياطي النقدي الاجنبي لمستويات قياسية ده بيخلق شبكة امان قوية قدام اي تقلبات مفاجئة.
فهل في حاجة تقلق؟
الاجابة لا بالمعنى المباشر.. التحرك الحالي طبيعي جدا في سوق بيستعيد توازنه بعد فترة مكاسب وبيتعامل مع قرارات نقدية جديدة وانتظار مستجدات دولية ومحلية الدولار ما خرجش عن السيطرة والجنيه ما دخلش في موجة هبوط حادة اللي حاصل هو حركة محدودة داخل نطاق مفهوم اقتصاديا.
فاللي حضرتك شايفه دلوقتي مش انعكاس ضعف لكن نتيجة تفاعل طبيعي بين العرض والطلب وترقب المستثمرين وتحركات السياسة النقدية طول ما المؤشرات الكلية مستقرة وطول ما الاحتياطي قوي وطول ما النمو ماشي في اتجاه صاعد يبقى اي تحرك طفيف في الدولار يفضل في اطار الطبيعي ومش سبب للقلق لكن سبب للفهم والمتابعة الهادية.
