كوريا الجنوبية جاية مصر وهتضخ استثمارت بالمليارات.. تعاون مهم في توقيت حساس
هو ليه فجأة مصر وكوريا الجنوبية داخلين على مفاوضات عاجلة؟ وليه التوقيت ده بالذات؟ وليه الاتفاقية دي بتتوصف انها شراكة اقتصادية شاملة مش مجرد اتفاق تجاري عادي؟ وليه كوريا شايفة مصر بوابة حقيقية للأسواق الناشئة كلها؟ والهم ليه الخطوة دي ممكن تغير شكل الاستثمار الكوري في المنطقة كلها؟
فيه تحرك مهم جدا بيتم بهدوء لكن تأثيره كبير وزير التجارة الكوري الجنوبي اتفق مع وزير الاستثمار والتجارة الخارجية المصري على بدء مفاوضات عاجلة لتوقيع اتفاقية شراكة اقتصادية شاملة بين البلدين والاتفاق ده مش وليد لحظة ده امتداد مباشر لقمة مهمة جمعت قيادتي مصر وكوريا في نوفمبر اللي فات واللي كانت رسالة واضحة ان العلاقات دخلت مرحلة جديدة.
اتفاقية الشراكة الاقتصادية الشاملة معناها ببساطة ان الموضوع اكبر من تبادل سلع او تخفيض جمارك دي اتفاقية بتفتح مجالات تعاون واسعة في التجارة والاستثمار والصناعة ونقل التكنولوجيا وسلاسل التوريد والتكامل الصناعي ودي النوعية اللي كوريا بتركز عليها جدا في تحركاتها العالمية.
كوريا النهارده بتدور على اسواق مستقرة ونقطة ارتكاز في مناطق جديدة وخصوصا مع حالة عدم اليقين اللي ضاربة التجارة العالمية ومع التوترات بين القوى الكبرى مصر بالنسبة لكوريا مش مجرد سوق محلي كبير لا دي بوابة حقيقية لافريقيا والشرق الاوسط واوروبا في نفس الوقت وده سر الاهتمام الكبير بالشراكة دي.
الاتفاقية دي هتساعد الشركات الكورية توسع اعمالها في الاسواق الناشئة وده هدف استراتيجي لكوريا في المرحلة الحالية ومصر بتمثل لهم مركز تشغيل وانتاج وتصدير في قلب المنطقة مع بنية تحتية اتطورت بشكل كبير خلال السنين اللي فاتت وشبكة موانئ وطرق واتفاقيات تجارية مع تكتلات ضخمة.
اما عن القطاعات اللي كوريا بتركز عليها في مصر فهي قطاعات تقيلة ومؤثرة في الاقتصاد اولها قطاع السيارات سواء تجميع او تصنيع مكونات وده قطاع كوريا عندها فيه خبرة عالمية وبتشوف في السوق المصري فرصة كبيرة للنمو والتصدير.
كمان قطاع اشباه الموصلات والتكنولوجيا المتقدمة وده ملف حساس ومهم جدا خصوصا في ظل السباق العالمي على سلاسل التوريد التكنولوجية ومصر هنا بتقدم مزيج من الموقع والعمالة والبنية الرقمية اللي بيشجع على دخول استثمارات من النوع ده.
قطاع الطاقة المتجددة واحد من اهم محاور الاهتمام الكوري في مصر خصوصا الطاقة الشمسية وطاقة الرياح وكوريا شايفة ان مصر تقدر تبقى مركز اقليمي لمشروعات الطاقة النظيفة سواء للاستهلاك المحلي او للتصدير.
البنية التحتية كمان من الملفات الاساسية من موانئ لمناطق لوجستية لمشروعات نقل ذكي وكلها مجالات كوريا عندها فيها شركات قوية وتجارب ناجحة عالميا.
الاهم من كل ده ان الاتفاقية دي مش بس هتزود ارقام تجارة او استثمار لكنها هتعمق التعاون في سلاسل التوريد والتقنيات الرقمية ونقل المعرفة وده النوع اللي بيخلق قيمة مضافة حقيقية للاقتصاد المصري وبيخلي الاستثمار طويل الاجل مش مجرد فلوس داخلة وخارجة.
التحرك ده معناه ان مصر بتثبت من جديد انها لاعب مهم في خريطة الاقتصاد العالمي وانها قادرة تجذب شركاء من النوع التقيل اللي بيفكر استراتيجيا وبيستثمر على المدى الطويل وكوريا الجنوبية واحدة من اهم النماذج اللي فاهمة كويس يعني ايه صناعة وتكنولوجيا ونمو مستدام.
اللي جاي في المفاوضات دي هيحدد شكل العلاقة الاقتصادية بين البلدين لسنين طويلة ونجاح الاتفاقية دي هيبقى رسالة قوية لباقي دول اسيا ان السوق المصري مفتوح وجاهز لشراكات حقيقية مش مجرد استثمارات عابرة.
