الدهب رايح على فين في 2026؟.. توقعات هتقلب الموازين
هو الدهب رايح على فين في 2026 ؟ وهل اللي جاي مفاجأة تفرح اللي مخزن دهب ولا صدمة للي مستني يصحح؟ وهل فعلا ممكن نشوف الأونصة عند 5 آلاف دولار ولا السيناريو الأقرب انها ترجع تاني تلمس 3 الاف دولار؟ السوق كله واقف حابس نفسه والعيون كلها على المعدن الأصفر اللي بقى مؤشر خوف وطمع في نفس الوقت.
الدهب طول عمره ملاذ آمن بس في السنين الاخيرة بقى كمان أداة استراتيجية في ايد البنوك المركزية ومع كل توتر عالمي او تضخم او قلق من العملات الورقية الطلب عليه بيزيد مش من افراد بس لكن من دول كاملة وده اللي مخلي الصورة في 2026 مختلفة عن اي دورة سابقة.
اللي حاصل ان البنوك المركزية حول العالم لسه مكملة شراء دهب بوتيرة قوية وده عامل دعم اساسي للسعر ومش بيخليه ينهار بسهولة حتى مع ارتفاع الفايدة او تحسن اداء بعض الاسواق وده معناه ان اي هبوط بيبقى محدود ومؤقت والاتجاه العام لسه طالع.
في نفس الوقت الاقتصاد الامريكي داخل 2026 وهو في وضع قوي نسبيا الانفاق على الذكاء الاصطناعي شغال الاستثمارات الرأسمالية عالية المستهلك لسه قادر يصرف واسعار الاصول المرتفعة عاملة اثر ثروة بيخلي الاقتصاد يستحمل تشديد تجاري او نقدي من غير ما يقع وده بيخلي الفيدرالي مش مضطر يندفع في تخفيض الفايدة.
التوقعات الاقرب ان تخفيضات الفايدة في 2026 تكون محدودة جدا ويمكن خفضين بس وده معناه ان العائد الحقيقي على الدولار مش هيقع بقوة وده عادة بيضغط على الدهب لكن اللي بيغير المعادلة المرة دي هو الطلب الرسمي العالمي من البنوك المركزية والقلق الجيوسياسي اللي مش بيهدى.
وبرغم قوة اسهم الذكاء الاصطناعي وارتفاع تقييماتها الا ان الوضع مختلف عن فقاعة الدوت كوم الشركات دلوقتي عندها ارباح حقيقية وسيولة قوية وميزانيات متينة وده مخلي الاسهم تفضل جاذبة لكن مش على حساب اختفاء الدهب من المحافظ.
الدهب في 2026 شكله هيكمل كجزء اساسي من اي محفظة متوازنة مش رهان مضاربي بس لكن عنصر حماية وتحوط ومع استمرار البنوك المركزية في تنويع احتياطاتها بعيد عن الدولار ومع اي توتر جديد في التجارة العالمية او السياسة الدهب بياخد دفعة اضافية.
عشان كده سيناريو وصول الأونصة لمستويات قريبة من خمسة الاف دولار بقى مطروح بقوة اكتر من سيناريو الرجوع لتلاتة الاف لان النزول الكبير محتاج صدمة عكسية ضخمة زي انهيار في الطلب العالمي او تشديد نقدي عنيف وده مش باين في الافق.
الاقرب اننا نشوف تذبذب وصعود تدريجي مع فترات هدوء وتصحيح بسيط لكن الاتجاه العام مايل للارتفاع وده يخلي اللي بيبص على 2026 محتاج يفهم ان الدهب مش لعبة توقيت قصير لكنه رهان طويل على عالم مليان عدم يقين.
وفي وسط عالم بيعيد تشكيل توازناته الاقتصادية والنقدية الدهب راجع يلعب دور البطولة من تاني مش بس كحماية من التضخم لكن كعملة ثقة عالمية لما الثقة في باقي الحاجات تهتز وده اللي يخلي 2026 سنة مفصلية في رحلة المعدن الاصفر.
