كشف جديد للغاز الطبيعي.. طرح أول مطار للقطاع الخاص.. واستقرار سعر الدولار
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، كشف جديد للغاز الطبيعي، وطرح أول مطار للقطاع الخاص، واستقرار سعر الدولار.
والبداية بخبر مهم حيث شركة دانة غاز أعلنت عن اكتشافات غاز جديدة في مربع شمال العريش البحري في مصر بعد ما طلعت النتائج الأولية لحفر بئر شمال الهرم واحد ناجحة جدا.
البيانات بتقول إن حجم الاكتشاف بيتراوح بين خمستاشر وخمسة وعشرين مليار قدم مكعبة ومع بداية التشغيل الإنتاج ممكن يوصل لتمانية مليون قدم مكعبة يوميا والاكتشاف ده جاي ضمن برنامج استثمار وتطوير قيمته مية مليون دولار هدفه يزود إنتاج الغاز ويرفع الاحتياطيات ويقوي اعتماد البلد على الطاقة المحلية.
وقبل كده الشركة كانت مخلصة حفر تلات آبار ضمن نفس البرنامج وضافوا حوالي عشرة مليون قدم مكعبة يوميا وكمان عمليات إعادة الإكمال زودت الإنتاج بتسعة مليون قدم مكعبة إضافية وبكده إجمالي الزيادة لحد دلوقتي وصل لتلاتين مليون قدم مكعبة يوميا والشركة متوقعة تبدأ حفر بئر جديد اسمه دافوديل في الربع الأول من يناير الجاي دعم لخطط التوسع وزيادة الإنتاج.
ونروح لوزارة الطيران المدني اللي أعلنت عن فتح باب التقدم رسميا للتحالفات والشركات المتخصصة اللي عايزة تتأهل لعملية الطرح لاختيار الشريك الاستراتيجي لإدارة وتشغيل وتطوير مطار الغردقة الدولي.
الوزارة قالت في بيان النهارده إن البرنامج ده جزء من استراتيجية مصر لتعظيم دور القطاع الخاص في إدارة وتشغيل المطارات ورفع جودة خدماتها بما يواكب أحدث المعايير والتقنيات العالمية وده كمان تنفيذا لبرنامج الطروحات اللي الحكومة أعلنته في يونيو ألفين تلاتة وعشرين بدعم من مؤسسة التمويل الدولية.
وحسب البيان البرنامج هدفه رفع كفاءة الخدمات للمسافرين ومواكبة النمو المتزايد في حركة السفر والسياحة خصوصا إن مصر مستهدفة استقبال تلاتين مليون سائح بحلول عشرين تلاتين.
وقال وزير الطيران المدني سامح الحفني إن اختيار مطار الغردقة إنه يكون أول مرحلة في برنامج الطروحات جاي لأنه تاني أكبر مطار في مصر من حيث الحركة الجوية وكمان واحد من أهم المطارات السياحية في استقبال السفر الدولي غير دوره الكبير في دعم النشاط الاقتصادي في البحر الأحمر.
وبيوضح الحفني إن تطوير المطار خطوة أساسية لرفع كفاءة التشغيل وتوسيع الطاقة الاستيعابية علشان تواكب الزيادة المستمرة في أعداد الزوار ويساعد في جذب رحلات دولية أكتر.
ونروح لسوق صرف العملات الأجنبية سعر الدولار النهارده استقر قدام الجنيه بعد قرار الفيدرالي الأمريكي بخفض الفايدة ربع في المية وسجل الدولار في البنك الأهلي المصري ٤٧ جنيه وخمسة وخمسين قرش للشراء و٤٧ جنيه وخمسة وستين قرش للبيع حسب آخر التحديثات.
وجاءت أسعار الدولار في البنوك كالتالي
في البنك التجاري الدولي ٤٧ جنيه وستة وخمسين قرش للشراء و٤٧ جنيه وستة وستين قرش للبيع.
في بنك قناة السويس ٤٧ جنيه تلاتة وخمسين قرش للشراء و٤٧ جنيه تلاتة وستين قرش للبيع.
في بنك البركة ٤٧ جنيه اتنين وخمسين قرش للشراء و٤٧ جنيه اتنين وستين قرش للبيع.
في بنك فيصل الإسلامي ٤٧ جنيه أربعة وخمسين قرش للشراء و٤٧ جنيه أربعة وستين قرش للبيع.
أما شركات الصرافة فسجل الدولار ٤٧ جنيه خمسة وخمسين قرش للشراء و٤٧ جنيه خمسة وستين قرش للبيع.
ونختم من سوق الصاغة أسعار الذهب في مصر النهارده ثبتت مع استقرار الأسعار العالمية بعد قرار الفيدرالي الأمريكي بخصوص الفايدة.
سعر جرام الدهب واحد وعشرين سجل خمسة آلاف ستمية خمسة وتلاتين جنيه والجرام أربعة وعشرين وصل لستة آلاف ربعمية وأربعين جنيه والجرام تمنتاشر سجل أربعة آلاف تمنمية وتلاتين جنيه والجنيه الدهب وصل لأربعة وخمسين ألف وتمانية جنيه وده حسب شعبة الذهب.
