الأرز بأرخص سعر من 3 سنين.. ليه الطن نزل لـ20 ألف فجأة؟
في مفاجأة محدش كان متوقعها.. أسعار الأرز بتسجل أقل مستوى من 3 سنين!
الطن نزل لـ 20 ألف جنيه جملة بعد ما كان وصل في شهور فاتت لأرقام قياسية وتخطى الـ40 جنيه للكيلو للمستهلك.
الهبوط الكبير ده مش من فراغ
السنة دي حصل فائض ضخم في الإنتاج وصل لأكتر من 850 ألف طن، وده بسبب موسم حصاد قوي جدًا أنتج حوالي 7 مليون طن أرز شعير، يعني أكتر من احتياجات السوق المحلي بكتير.
ومع الزيادة دي السوق اتشبع، والأسعار بدأت تنزل تدريجيًا طول السنة لحد ما وصلت لأقل مستوى دلوقتي.
كمان في عوامل تانية ساعدت على الهبوط ده.. زي الركود الكبير في السوق، وإن المواطنين قللوا استهلاكهم للسلع عمومًا بسبب ظروف المعيشة.
غير كده، إغلاق معبر رفح رجع آلاف الأطنان اللي كانت بتطلع كمساعدات لغزة، فدخلت السوق تاني ونزّلت الأسعار أكتر.
ده غير إن جزء كبير من الضيوف السودانيين رجعوا بلادهم، وده قلل الطلب على الأرز والسلع الأساسية بشكل واضح.
دلوقتي.. سعر الأرز الجملة بقى 20 جنيه للكيلو، وللمستهلك بيتراوح بين 22 و25 جنيه حسب المنطقة وطبيعة العرض والطلب.
يعني بعد سنوات من الارتفاع الجنوني.. واضح إن الأرز رجع لسعر منطقي.. والسوق رايح لاستقرار ممكن يستمر معانا لاخر 2025
