"صنع في مصر".. بورسعيد تستعد لإطلاق أول عربة مترو أنفاق بأيدٍ مصرية مارس 2026
في وقت ناس كتير كانت فاكرة إن صناعة عربات المترو حاجة بعيدة عنا، مصر دلوقتي بتفاجئ الكل وبتعلن عن أول عربة مترو هتتولد من قلب مصنع مصري 100% في شرق بورسعيد.. خطوة بنقول عليها بداية عصر جديد.. عصر الصناعة الثقيلة "صنع في مصر" مش كلام ولا شعارات، لأ مشروع ضخم بيكبر قدّام عينينا وهيغير شكل النقل في البلد كلها.
من كام سنة، فكرة إن مصر تدخل مجال صناعة عربات المترو والقطارات مكانتش قريبة من التنفيذ، كنا دايمًا بنستورد، ندفع ملايين، ونستنى الشحن والتوريد، لكن دلوقتي الصورة اتغيّرت تمامًا.. لأن شرق بورسعيد بتجهز تطلق أول عربة مترو أنفاق مصرية في مارس 2026، وده من خلال الشركة الوطنية لصناعة السكك الحديدية "نيرك" اللي بقت عنوان جديد للصناعة المحلية.
القصة بدأت لما الدولة قررت إنها مش هتفضل تعتمد على الاستيراد في قطاع النقل، المشاريع الجديدة اللي بتتعمل كل يوم، خطوط مترو جديدة، تطوير للسكك الحديد.. كل ده محتاج عربات كتير، ومحتاج إنتاج محلي يقلل التكاليف ويوفر عملة صعبة، من هنا اتولد مشروع مصنع "نيرك" على مساحة ضخمة توصل لـ 100 ألف متر مربع في شرق بورسعيد.
المصنع ابتدى تشغيل تجريبي من فترة بسيطة، وده معناه إن خطوط الإنتاج اشتغلت، والاختبارات بدأت، والعمالة المصرية المتخصصة بقت جزء أساسي في التصنيع، وده في حد ذاته إنجاز لأن نقل التكنولوجيا مش بيحصل في يوم وليلة.. محتاج تدريب وشغل كتير وشراكات قوية، وده اللي فعلاً حصل مع هيونداي روتيم الكورية اللي شاركت في بناء الخبرة والتكنولوجيا جوه المصنع.
المصنع مش بس هيصنع عربة واحدة.. لا، ده جزء من خطة جبارة لتصنيع 40 قطار كامل للخطين التاني والتالت للمترو بإجمالي 320 عربة مكيفة، وده معناه إن المترو اللي بنركبه كل يوم جزء كبير منه هيكون "صنع في مصر" لأول مرة.
ومش هنا وبس المصنع حاليًا بيدرس إنشاء مصنع تاني في المنطقة نفسها على مساحة 50 ألف متر. والمرة دي الهدف مش عربات كاملة، لأ.. أجزاء داخلية زي الأسقف، الأرضيات، الكراسي، المكونات الصغيرة اللي كنا بنستوردها، وكل ده بهدف إن نسبة المكون المحلي توصل لـ 25% في الأول وبعدها تزيد أكتر وأكتر.
ومشروع "نيرك" مش واقف على القاهرة بس لأ، الإسكندرية كمان داخلين اللعبة، اتفقوا بالفعل على تصنيع 21 قطار لمشروع مترو أبو قير الجديد، المشروع اللي هيغيّر شكل النقل في إسكندرية كلها، وكل قطار فيه نسبة تصنيع محلي 35% وده رقم كبير جدًا بالنسبة لصناعة لسه في بدايتها.
والأهداف الأكبر لسه جايّة، الشركة شغّالة كمان على مشروع تاني ضخم لتوريد 500 عربة ركاب للسكة الحديد بنسب تصنيع محلي ممكن توصل لـ 70% وده يعتبر نقلة حقيقية في الصناعة المصرية.
بس المميز في "نيرك" إنها مش شركة حكومية بالكامل ولا خاصة بالكامل.. دي نموذج تعاون جديد ما بين الدولة والقطاع الخاص بنظام حديث، هدفه إنه يبني صناعة كبيرة تقدر تقف على رجليها، وتنافس، وتصدر كمان في المستقبل.
اللي بيحصل ده مش مجرد مصنع.. ده بداية تأسيس صناعة كاملة هتبني خبرة وهتوفر آلاف الوظايف وهتحقق حلم ناس كتير كانت مستنية تشوف "عربة مترو صنع في مصر" بجد مش مجرد حلم على ورق. ومارس 2026 هيكون اللحظة اللي كل ده يتقال فيها للعالم: مصر بقت بتصنع عربات مترو من أول مسمار لحد آخر لمسة.
