7 أخطاء تفسد عداد الكهرباء مسبق الدفع.. خلي بالك قبل ما النور يقطع
ناس كتير بتشتكي من عداد الكهرباء مسبق الدفع.. الرصيد بيطير! الشريحة بتعلى! والنور بيقطع من غير سبب! بس الحقيقة في 7 تعليمات لو ما التزمتش بيهم، العداد هيبهدلك حرفيًا!
أول حاجة.. ضبط الوقت والتاريخ. وأنت بتشحن الكارت، لازم الوقت يكون مظبوط علشان العداد ميغلطش في حساب الاستهلاك، وكل شحنة بتتسجّل عنده تلقائي.
تاني نقطة.. لو الكارت ضاع ماتقلقش.. الرصيد مش بيروح، تقدر تسترجعه في كارت جديد لأن كل البيانات محفوظة في العداد نفسه.
تالت حاجة.. إوعى تفتح العداد أو تلعب في الأسلاك.. أي تلاعب بيؤدي لفصل التيار وغرامة.. والموضوع بيتسجل.
رابع نقطة.. الأحمال. لو حملت على العداد أكتر من 80 أمبير، هيقفل لوحده.. ولو حصل 3 مرات، الشركة لازم تيجي تشغله.. وبرضه يفضل تشحن أول الشهر وتقلل الاستهلاك في آخره علشان متقفزش على الشريحة الأعلى.
خامس حاجة.. الإنذار. العداد بينبهك أول ما الرصيد يقرب يخلص، حوالي 10 جنيه فتابع علشان متتفاجئش.
سادس نقطة.. لو العداد واقف، بيتخصم 9 جنيه.. اتأكد إنه شغال.. ولو النور قطع ومعاكش الكارت، تقدر ترجع الكهرباء ببطاقتك الشخصية أو الفيزا لحد ما تستخدم الكارت.
وأخيرا العداد بيديك كل البيانات اللي محتاجها.. اضغط على الزر اللي فيه، وهتلاقي استهلاكك، رصيدك، والشريحة اللي إنت فيها بالتفصيل.. اتبع الـ 7 تعليمات دول، وهتوفر على نفسك أعطال، وغرامات، وقطع نور ملوش لازمة
