عايز تغير عداد الكهرباء القديم؟ دي أسهل طريقة تركب بيها عداد بكارت
لو عندك عداد كهربا قديم أو تالف أو حتى نفسك تغيره وتريح دماغك.. وزارة الكهرباء بتسهل عليك الموضوع وبتبدله ب عداد مسبوق الدفع.
والخطوات بسيطة: أول حاجة بتروح شركة التوزيع اللي تبع منطقتك، وببطاقتك تملى طلب فحص.. ولو مش حابب تروح؟ تقدر تعمل الطلب أونلاين من المنصة الموحدة للكهرباء أو تكلم الخط الساخن.
بعد ما تقدم الطلب بتسدد 195 جنيه رسوم فحص أو استبدال.. وبعدين الشركة بتحسب متوسط استهلاكك آخر 3 شهور وبتعملك تسوية لأي متأخرات قبل ما ترفع العداد القديم.
العداد بيتفحص خلال 3 أيام وبعدها بيتم تحديد المديونية لو فيه.. ولو عليك مبلغ يتخصم من الشحن أو تدفعه كاش أو حتى تقسيط.. أول ما يركبوا العداد الجديد لازم تشحن 100 جنيه.
ولو مشحنتش هما بيشحنوه بـ30 جنيه عشان الكهرباء تشتغل، وبيتضاف المبلغ على حسابك.. وطبعًا لو رفضت العداد الجديد بدون سبب بيتسجل اعتراض رسمي وبتتحول لشرطة الكهرباء.
طيب ليه أصلاً تركب عداد بكارت؟ لأنه ببساطة هتعرف استهلاكك أول بأول.. وهتتحكم في مصاريفك، مفيش فواتير غلط، وشحنه أسهل من أي وقت، كله إلكتروني.. غير إن القطاع بيقلل خسائره وانت بتدفع على قد استهلاكك وبس.
