طريقة شحن عداد الكهرباء من الموبايل في خطوات بسيطة
لو عندك عداد كهربا مسبوق الدفع، في طريقة سهلة جدًا تقدر تشحن بيها العداد من الموبايل وانت في البيت ومن غير ما تروح لأي مكان.
أول حاجة لازم تبدل كارت الشحن القديم بكارت جديد يدعم خاصية الـNFC من شركة الكهرباء.
وتتأكد إن موبايلك أندرويد وبيشغل خاصية NFC.
بعدها بتنزل تطبيق سهل أو كهربا خالص أو فوري من Google Play أو App Store.
هتحط كارت الشحن على ضهر الموبايل التطبيق هيقرأ البيانات علطول
بعد كده تقدر تشوف الرصيد اللي موجود في العداد.
ولما تحب تشحن.. بتدخل المبلغ اللي عايزه من المحفظة الإلكترونية أو الفيزا، وبتكمل عملية الدفع والكارت لسه ورا الموبايل.
آخر خطوة.. بتدخل الكارت في العداد علشان يتحول الرصيد فورًا
ولو الكارت ضاع كل اللي عليك تروح لشركة الكهرباء وتطلب بدل فاقد، بتكتب إقرار بالفقد، وتقدم بطاقة الرقم القومي وكود المشترك أو إيصال شحن قديم
العملية كلها بتاخد من 25 لـ30 دقيقة، ورسوم استخراج الكارت 85 جنيه
وبس كده.. شحن عداد الكهرباء بقى أسهل وأسرع ومن غير ما تتحرك من مكانك.
