وداعا للزحام بتكلفة تبدأ من 8 جنيهات.. القاهرة تطبق منظومة جديدة لتسعير تذاكر أتوبيسات النقل العام
من النهارده شكل المشوار في القاهرة مش زي قبل كده.. القصة مش مجرد أتوبيس ولا خط جديد الموضوع أكبر من كده بكتير.
العاصمة بدأت تطبيق نظام مختلف تمامًا لتسعير التذاكر، نظام محسوب بالمحطة مش بالسعر الموحد، خطوة ناس كتير كانت مستنياها لأنها في الآخر هتوفر على الراكب اللي بيمشي خط قصير، ومش هيظلم اللي بيقطع خط طويل وكل ده بهدف إن الناس تلاقي وسيلة نقل عادلة ومريحة وسعرها منطقي.
القاهرة خلاص دخلت مرحلة جديدة في نظام النقل العام أخيرًا بقى في تسعيرة محسوبة على قد المشوار، لا زيادة ملهاش معنى، ولا تذكرة واحدة تشمل الناس كلها حتى لو واحد نزل بعد 4 محطات بس.
النظام الجديد ببساطة قائم على فكرة إن كل راكب يدفع على قد المسافة اللي بيقطعها، يعني لو بتروح مشوار قصير، هتدفع نص تذكرة ولو خطك طويل هتحاسب بكامل التذكرة، وده تغيير مهم جدًا، لأنه لأول مرة المواطن يحس إن التعريفة ماشية مع الاستخدام الحقيقي.
أسعار نص التذكرة بدأت من 8 جنيهات، وبتزيد تدريجي حسب عدد المحطات لحد ما توصل لـ 18 جنيه، أما التذكرة الكاملة فبتبدأ من 12 جنيه للأتوبيس العادي، وبتوصل لـ 23 جنيه للمكيف، النظام ده معمول بشكل تدريجي، بحيث يراعي اختلاف الخطوط وطولها، وكمان مستوى الخدمة ما بين أتوبيس عادي وأتوبيس مكيف.
والجميل في النظام ده إنه بيخدم فئات كتير أولهم الطلاب اللي بيتنقلوا مسافات قصيرة من البيت للجامعة أو المدرسة، بدل ما كانوا بيدفعوا كامل التذكرة كل يوم، دلوقتي هندفعوا نصها بس، وده مع الوقت هيفرق جامد في ميزانية أي أسرة عندها اتنين أو تلاتة طلاب نفس الكلام على الموظفين اللي مشوارهم ثابت وقصير بدل ما يضطر يركب مواصلتين علشان يوفّر، دلوقتي يقدر يركب الأتوبيس ويدفع تمن معقول.
كمان النظام الجديد معمول علشان يشجع الناس تسيب عربيتها وتستخدم النقل العام، لما تبقى التذكرة سعرها محسوب بالعقل، والخدمة تتحسن، وتبقى الرحلة أوضح وأسهل، ده هيزود عدد الركاب، وهيقلل التكدس والزحمة اللي ماليه الشوارع، كل ما الناس تركب نقل عام أكتر، الشوارع هتهدى وتتنفس.
وبرغم إن أسعار البنزين والسولار زادت، إلا إن طريقة الحساب الجديدة وزعت الحمل بشكل عادل، يعني بدل ما كانوا يرفعوا سعر التذكرة على الكل مرة واحدة لأ اتعمل نظام مرن، يقسم التكلفة حسب كل خط وعدد محطاته، الفكرة هنا مش رفع السعر الفكرة تنظيم السعر.
شركات النقل الجماعي كمان بقت ماشية على نفس المبدأ، أسعار خطوط الميني باص تم تحديدها بشكل واضح.. 18 جنيه للخط العادي، و22 جنيه للمكيف، وده عامل توازن ما بين تكلفة التشغيل وبين قدرة الناس على الدفع.
ومع النظام ده، هيئة النقل بتشتغل في الاتجاه التاني كمان.. تحسين جودة الخدمة، لأن الناس مش هتتقبل تسعيرة محسوبة ومنظمة، إلا لو لقت أتوبيسات أنضف، مواعيد أوضح، وزحمة أقل.
وخليني اقولك ان اللي بيحصل دلوقتي خطوة مهمة علشان القاهرة تبقى مدينة أسهل في الحركة، نظام تسعير منطقي وتوزيع للأجرة على حسب المسافة وتحسين تدريجي في الخدمة، ده طريق طويل، لكن اللي حصل النهارده بداية قوية.
في النهاية.. المشوار اللي كنت بتدفع له 20 جنيه، ممكن النهارده يتكلف 8 بس، والمشوار الطويل اللي كان بيعمل زحمة في المواصلات، دلوقتي هيتنظم بفضل التعريفة الجديدة، القاهرة بتاخد خطوة لقدام خطوة يمكن تغير شكل التنقل فيها خااالص.
