باستثمارات 3 مليارات جنيه.. أتوبيسات مصرية كهربائية تغزو الأسواق الأوروبية
في قلب الشرقية، وجوّه مدينة الصالحية الجديدة، في مصنع بيحصل فيه حدث هيغيّر شكل الصناعة والنقل في مصر.
حدث مش بس محلي، ده خبر للعالم كله، النهاردة مصر مش بس بتصنع... مصر بتصدّر لأوروبا.. طي إيه اللي بيحصل في الشرقية؟.. والمصنع ده هيصدر إيه؟ وحجم استثماراته؟.. ده اللى هنعرفه.
الفريق كامل الوزير – نائب رئيس مجلس الوزراء للتنمية الصناعية وزير الصناعة والنقل – افتتح النهاردة خط إنتاج جديد لشركة MCV بالتعاون مع شركة فولفو العالمية، واللي هيكون مخصص لتصنيع الاتوبيسات الكهربائية وتصديرها لأسواق أوروبا.
تخيلوا أوروبا نفسها، اللي عندها أعلى معايير للجودة والبيئة، بتستورد دلوقتي من هنا من مصر.
الخط الجديد اتبنى باستثمارات وصلت لـ ٣ مليارات جنيه، بطاقة إنتاجية سنوية ١٢٠٠ أتوبيس كهربائي، ومع مصانع تانية شغالة، مصر دلوقتي قادرة تطلع ما بين ٢٠٠٠ لـ ٢٥٠٠ أتوبيس كل سنة. وده معناه إننا وقفنا استيراد الأتوبيسات من برّه، وبقينا مكتفين ذاتيًا، بل وبنزود كمان على التصدير.
المشروع مش بس أتوبيسات،دي رؤية متكاملة، من أول التكنولوجيات الحديثة اللي اتنقلت لمصر، لأنظمة إنتاج بتقلل الانبعاثات الكربونية، لحد توطين الصناعات المغذية، زي صناعة زجاج السيارات، اللي الحكومة بتدرس التوسع فيها لتغطية السوق المحلي وزيادة التصدير.
والأهم إن المشروع ده هيوفر أكتر من ٢٠٠٠ فرصة عمل جديدة، وهيكون سبب رئيسي في تدريب وتأهيل شباب مهندسين وفنيين مصريين، عشان يبقى عندنا خبرة محلية في صناعة وسائل النقل الكهربائية، يعني مش بس بنصنّع منتج، إحنا بنبني صناعة كاملة. وده كله جزء من خطة الدولة الكبيرة، خطة إن صادراتنا الصناعية تتضاعف وتوصل لأكتر من ١٧٠ مليار دولار بحلول ٢٠٣٠.
واللي بيحصل في الصالحية الجديدة النهاردة، مش مجرد افتتاح مصنع، ده إعلان واضح إن مصر مش بتستنى المستقبل مصر بتصنعه.
من قلب الشرقية من أرض مصر أتوبيسات كهربائية عليها لوجو (صنع في مصر)، هتمشي في شوارع لندن، باريس، أو برلين، ده مش حلم بعيد ده واقع ابتدينا نشوفه، وبإيدين مصريين.
