تحويل مدفن شبرامنت في مصر إلى منطقة سياحية.. شركة عالمية تضخ استثمارات بـ4 مليارات دولار
مصر داخل مع شركة عالمية عشان تحول مدفن شبرامنت إلى منطقة سياحية، بس هل استثمار بـ4 مليارات دولار في مدفن سابق هيغير شكل المنطقة بالكامل؟، وهل شبرامنت هتبقى أكبر منطقة خضراء سياحية في الجيزة بعد التحويل؟، وإزاي مشروع ضخم بالشكل ده هيتم من غير ما الدولة تتحمل أي تكلفة؟، وهل تحويل مدفن لمعلم سياحي فكرة جديدة على المنطقة ولا خطوة متأخرة؟
واضح إن مصر داخلة على واحدة من أكبر وأهم المشروعات البيئية والسياحية في السنين الجاية، وده بعد ما شركة “بولار هيدرو” البريطانية أعلنت رسميًا إنها هتضخ ٤ مليارات دولار علشان تطور مدفن شبرامنت في الجيزة، وتحوله من مكان مهجور ومليان مخلفات، لمنطقة خضراء مفتوحة ومعلم سياحي عالمي، وكل ده من غير ما الدولة تدفع جنيه واحد.
القصة بدأت مع اجتماع مهم جمع الفريق كامل الوزير وزير الصناعة والنقل – مع رئيس مجلس إدارة بولار هيدرو، “جوليان روجرز كولتمن”.
الاجتماع كان هدفه متابعة خطة الشركة في مصر، وخاصة مشروع شبرامنت اللي بيعتبر واحد من أهم المواقع الحيوية بسبب موقعه المميز بين أهرامات الجيزة وسقارة، وعلى مساحة ضخمة بتوصل لـ ٧٣٠ فدان.
الشركة عرضت خطتها بالتفاصيل، واللي بتعتمد على إنها تعمل منشأة حديثة لمعالجة المخلفات القديمة والجديدة، باستخدام تكنولوجيا متطورة بتوصل لصفر انبعاثات، يعني من الآخر، هيتحول مكان كان بيصدر تلوث لمكان صديق للبيئة ١٠٠٪، وبعد ما المخلفات تتعالج ويتم تنظيف المدفن بالكامل، هيتم تحويله لحديقة خضراء ضخمة مفتوحة، حاجة شبه حديقة الأزهر كده، بس على مساحة أكبر وبطابع حضاري وسياحي يناسب المنطقة الأثرية.
كمان المشروع هيبقى ليه قدرة معالجة يومية ضخمة جدًا، الجزء الخاص بالمخلفات الجديدة هيتنفذ في خلال ٣٦ شهر، والطاقة الإنتاجية هتوصل لـ١٠ آلاف طن يوميًا، وبعد كده هتزيد لحد 19200 طن في المرحلة النهائية، وده رقم يخلي شبرامنت واحدة من أكبر منشآت المعالجة البيئية في الشرق الأوسط.
الميزة الكبيرة في المشروع إن كل الاستثمارات، اللي بتوصل لـ ٤ مليارات دولار، الشركة البريطانية هي اللي هتمولها بالكامل، يعني لا قروض، ولا تحميل على ميزانية الدولة، بالعكس، الشركات المصرية هتشارك في التنفيذ، وده معناه فرص عمل كبيرة وفلوس داخلة للسوق المصري.
والموضوع مش بيقف عند المعالجة بس، بولار هيدرو مخططة تعمل مراكز تعليمية وتوعوية خاصة بالبيئة ومناطق ترفيهية وسياحية تستغل الطبيعة التاريخية للمكان ومساحات خضراء واسعة تضيف جمال وقيمة للاستثمار.
شركة “بولار هيدرو” مش شركة عادية، دي واحدة من الشركات العالمية المتخصصة في تقنيات المعالجة وإعادة التدوير بصفر انبعاثات، وعندها مشروعات في دول كتير، واختيارها لمصر، خصوصًا في مشروع بحجم ده، معناه ثقة كبيرة جدًا في السوق المصري وفي قدرته على جذب الاستثمارات.
يعني من الآخر، مشروع شبرامنت مش مجرد تطوير مدفن قديم، ده إعادة إحياء كاملة لمكان مهم، وتحويله من مشكلة لعائد اقتصادي وسياحي وبيئي ضخم، وخطوة جديدة عشان مصر تبقى مركز إقليمي في المشروعات الخضراء.
