مصر تخطو نحو مستقبل صناعي.. شراكة كبرى لإنشاء 10 مدارس متخصصة في صناعة الحديد والصلب
في خطوة كبيرة بتأكد إن التعليم الفني في مصر داخل على مرحلة جديدة تمامًا، الدولة أعلنت عن شراكة ضخمة مع شركات محلية وعالمية لإنشاء 10 مدارس متخصصة في صناعة الحديد والصلب.
المشروع ده جزء من خطة أكبر بكتير هدفها إعادة تشكيل التعليم الفني في مصر، وربطه بالصناعة الحقيقية، علشان يطلع جيل جاهز يشتغل.. مش بس يتخرج، والأهم: إن الخريج المصري ينافس عالميًا مش محليًا بس.
لو بصينا حوالينا هنلاقي إن كل الدول اللي صنعت نهضة صناعية حقيقية بدأت من التعليم الفني، ومصر قررت تمشي في نفس الطريق بس بخطوات واسعة، الدولة أعلنت عن شراكة قوية تجمع ما بين مجموعة شركات حديد عز، وشركة دانييلي الإيطالية، واحدة من أكبر الشركات العالمية في تصنيع معدات الحديد والصلب، والنتيجة: إنشاء 10 مدارس متخصصة بالكامل في صناعة الحديد والصلب.
المدارس دي مش مجرد فصول وورش.. دي مصانع صغيرة بتجهز العامل والفني على شغل حقيقي من أول يوم، وده جزء من خطة أكبر لإنشاء وتشغيل 89 مدرسة تكنولوجيا تطبيقية هتبدأ تشتغل من سنة 2026/2027 في مجالات مختلفة، وكلها وفق أعلى المعايير العالمية.
الشراكات الإيطالية اللي دخلت بقوة في المنظومة دي بتأكد إن مصر عايزة تعمل نقلة نوعية في التعليم الفني.. نقلة تشبه اللي حصل في دول صناعية زي ألمانيا وإيطاليا، والهدف واضح: نخرج فنيين على كفاءة عالية، عندهم تدريب عملي محترف، ويقدروا ينافسوا في سوق العمل داخل مصر وبره مصر.
وخليني اقولك ان واحدة من أهم أهداف الخطة دي هي رفع كفاءة العمالة المصرية، يعني العامل اللي هيطلع من المدارس دي يكون فاهم الصناعة، عارف التكنولوجيا، متدرب على أحدث الماكينات، وعنده قدرة حقيقية إنه يزود الإنتاج ويحسن الجودة، ومع توسع الصناعات في مصر، الطلب على العمالة الفنية المدربة بقى أكبر من أي وقت فات.
والجميل إن التطوير مش واقف على الحديد والصلب بس.. ده مشروع ضخم بيضم تخصصات كتير جدًا، وكلها مربوطة بقطاعات شغالة فعليًا في السوق
مثلاً:
مجال الضيافة:
تم إنشاء 10 مدارس جديدة بالشراكة مع مؤسسات عالمية، لتدريب كوادر محترفة في السياحة والفنادق، ومصر أصلًا عندها فرصة ذهبية في القطاع ده.
الميكانيكا والكهرباء واللحام:
شراكة مع الهيئة العربية للتصنيع لإنشاء مدارس متطورة بتقدم تدريب عملي قوي جدًا، لأن الصناعات الهندسية من أكتر المجالات اللي محتاجة فنيين متخصصين.
تكنولوجيا المياه والري:
5 مدارس جديدة بتتخصص في إدارة المياه ومعالجة وتحليتها.. مجالات هي المستقبل، خصوصًا مع التغيرات المناخية وزيادة الاحتياج لحلول مبتكرة.
الزراعة والصناعات الغذائية:
10 مدارس مشتركة مع وزارة الزراعة، غير 26 مدرسة مع جهاز مستقبل مصر.. ودي نقلة كبيرة لأنها بتخدم مشروع الدلتا الجديدة والزراعة الحديثة.
النقل المستدام واللوجستيات:
مدرسة متخصصة في واحد من أسرع القطاعات نموًا في العالم.
الغزل والنسيج والصناعات المعدنية والأزياء:
مدارس بتعيد إحياء صناعات مصرية تاريخية، وبتجهز شباب يشتغل مباشرة في مصانع قائمة بالفعل.
بصراحة.. اللي بيحصل هو إعادة بناء كاملة لجسم التعليم الفني، بدل ما كان بيتقال "مدارس صنايع بتخرج عمال"، النهارده بنقول: "مدارس تكنولوجيا بتخرج فني على مستوى عالمي"
والنتيجة شباب عنده فرصة حقيقية لشغل محترم.. ومصانع تقدر تعتمد على فنيين مهرة.. واقتصاد بيكبر بخطوات ثابتة.
ومع اكتمال المشروع ده خلال السنين الجاية.. مصر مش بس هتبقى عندها مدارس فنية.. مصر هتبني جيل صنايعية جديد بمواصفات عالمية.
