تعاون جديد بين مصر و"نايكي العالمية".. وتوقعات بوصول سعر الذهب إلى 5 آلاف دولار
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن تعاون جديد بين مصر و"نايكي العالمية".
في خطوة كبيرة بتفتح باب جديد للصناعة في مصر، المنطقة الاقتصادية لقناة السويس أعلنت عن بدء إنشاء أول مصنع تايلاندي من نوعه جوه البلد لإنتاج الملابس الرياضية لأكبر البراندات العالمية زي Nike وJordan وJoe Boxer وWarrix Sports.
المشروع ده مش شغل عادي، ده دخول رسمي لمصر في سلاسل تصنيع الملابس الرياضية اللي بتتصدّر لأوروبا وأمريكا.
المصنع هيتبني في القنطرة غرب – الإسماعيلية بعد ما رئيس الهيئة الاقتصادية وليد جمال الدين ومحافظ الإسماعيلية اللواء أكرم جلال حطّوا حجر الأساس لمصنع “هاي تك – شمال إفريقيا”، باستثمارات حوالي 20 مليون دولار وعلى مساحة كبيرة جدًا بتوصل لـ 64 ألف متر مربع.
شركة Hi-Tech اللي بتعمل المصنع تعتبر من أكبر الشركات في آسيا في مجال الملابس الرياضية، وبتنتج أكتر من 60 مليون قطعة سنويًا من مصانعها في تايلاند وفيتنام وكمبوديا ولاوس.
وجودها في مصر معناه ثقة قوية في السوق المصري وفي العمالة هنا.
المصنع الجديد هيشغل حوالي 2000 عامل وهيقدر يطلع 6 مليون قطعة كل سنة لبراندات عالمية معروفة كلنا بنلبسها.
اختيار القنطرة غرب جه بسبب العمالة الكتير، التجهيزات الصناعية، والقُرب من مواني التصدير اللي بتسهّل وصول المنتج للعالم كله بسرعة وتكلفة أقل.
والأهم أن فيه خطة إن الإنتاج يوصل لـ20 مليون قطعة سنة 2027، وهيتم تصديرهم للخليج، وشرق إفريقيا، وتركيا، واليونان، وكمان أوروبا وأمريكا، وده معناه إن مصر داخلة بقوة في سوق الملابس الرياضية العالمي.
منصات بانكير قدمت تقرير مختلف النهاردة عن توقعات بوصول سعر الذهب إلى 5 آلاف دولار.
الفترة اللي فاتت العالم كله كان عايش حالة ارتباك، عملات بتنزل، بورصات بتعلى وتنهار، دولارات بتتهز، وحروب شغالة في كل ناحية.. ووسط الدوشة دي، الدهب كان ماشي لوحده، هادي وثابت، وبيطلع خطوة وراء التانية من غير ما يتأثر زي باقي الأسواق.
دلوقتي بقى في توقعات قوية إن سنة 2026 هتكون سنة تاريخية للدهب، لأن كل المؤشرات بتقول إن الصعود الجاي مختلف عن أي موجة قبل كده، فيه محللين شايفين إن الدهب أصلاً كان المفروض يوصل 5000 دولار من زمان، وإن اللي جاي أقوى.
ليه؟ لأن الدهب دايمًا بيعلى في وقت التوتر، وكل يوم العالم ما بين أزمات سياسية وحروب، وتقلبات اقتصادية، يعني الطلب عليه كملاذ آمن بيزيد يوم بعد يوم.
غير كده، العملات الرقمية اللي ناس كتير كانت فاكرينها "دهب المستقبل" وقعت جامد، وده رجّع المستثمرين للأصل اللي عمره ما خان حد: اللي هو الدهب.
طب ليه بالظبط 2026؟.. لأن التوقعات بتقول إن البنوك المركزية هتبدأ تخفض الفايدة، ولما الفايدة تنزل الناس بتبعد عن الشهادات والسندات وتروح للدهب لأنه أكثر أمانًا وجاذبية، غير أن البنوك نفسها بقت بتشتري ذهب بكميات ضخمة، وده مؤشر خطر إن في موجة كبيرة جاية.. وفي احتمال إن الدولار يضعف، وساعتها الذهب بيولّع صعود بشكل سريع.
دلوقتي الدهب في مرحلة "تجميع"، يعني الكبار بيشتروا بهدوء قبل الانطلاقة، ولو حصل الانفجار اللي بيتكلموا عنه، الأسعار ممكن تقفز بسرعة كبيرة وتوصل لمستويات تاريخية لحد 5000 دولار.
وحدة أبحاث بانكير قدمت تقرير خاص النهاردة عن نقطة لقاء المترو مع القطار السريع والمونوريل لأول مرة.
القاهرة طول عمرها زحمة ودوشة، والناس بتضيع وقت كبير في المواصلات، علشان كده الدولة بدأت تفكر في شبكة نقل حديثة تربط العاصمة ببعضها بسهولة، ومن هنا جه الخط السادس للمترو اللي يعتبر أحدث وأطول خط في شبكة مترو القاهرة، ومصمم يكون العمود الفقري اللي بيربط كل وسائل النقل الجديدة في نقطة واحدة.
المرحلة الأولى من الخط طوله حوالي 38 كم من الخصوص لحد المعادي الجديدة، وفي النص في 26 محطة ما بين سطحي وعلوي ونفقي، ومعاهم ورشتين صيانة كبار في الخصوص وزهراء المعادي.. الخط هيقلل الزحمة على مناطق كتير زي جسر السويس، طرة، والمعادي، لأنه كهربائي بالكامل وسريع وبيقلل التلوث والزحمة فوق الأرض.
الأهم بقى إن المشروع مش هيقف هنا، في مرحلة تانية هتزود الخط شمال وجنوب
● الامتداد الجنوبي: حوالي 17 كم لحد محطة محمد نجيب على طريق السخنة، ودي نقطة ربط قوية جدًا مع القطار الكهربائي السريع، يعني تقدر من المترو تروح العاصمة الإدارية أو السخنة أو حتى مطروح.
● الامتداد الشمالي: حوالي 6 كم لحد النرجس في القاهرة الجديدة، وهناك هيربط مع مونوريل شرق النيل، وده أول ربط مباشر بين المترو والمونوريل في مصر.
غير كده الخط السادس هيتقاطع مع خطوط المترو التانية
– الخط الأول عند الدمرداش وطره البلد
– الخط الثالث عند العباسية
– الخط الرابع عند السيدة عائشة
وده بيخليه "عقدة نقل" حقيقية تربط القاهرة كلها.
المشروع كمان هيعمل نقلة عمرانية، ده غير أن قيمة المناطق هتعلى والخدمات هتزيد، وآلاف الوظائف هتظهر في الإنشاء والتشغيل.
يعني باختصار، الخط السادس مش بس مترو جديد، ده خطوة كبيرة في مستقبل النقل في القاهرة وهيسهل حياة ملايين كل يوم.
