إزاي تستف ورقك صح عشان تاخد شقة تمويل عقاري دلوقتي
أكيد انت واحد من الناس اللي راحوا ياخدوا شقة تمويل عقاري ولقى الدنيا كلها معقدة فراح واخد بعضه وروح.
لأ ركز معايا في اللي هقوله.. هتروح البنك اللي مرتبك بينزل عليه تطلب منه كشف حسابك لمدة ٦ شهور.. لو مرتبك ١٣ ألف وانت عازب أو ١٨ ألف وانت متجوز فما تحت فانت كدا هتخش مبادرة ال٨٪ .. لو أكبر من كدا هتخش مبادرة ال١٢٪.. مبادرة ال٣٪ خلاص اتلغت زي مانت عارف.
هتاخد كشف الحساب وتحط معاه صورة البطاقة وتجيب صورة عقد الشقة النهائي من صحابها اللي هتشتريها منه وكل الأوراق بتاعتها اللي تفيد إن الشقة دي معليهاش لا فلوس ولا أقساط وخلصانة ومعليهاش حظر ولا أي مشاكل نهائيا.. ولازم يكون متأمن عليك بالنسبة لبنوك وبنوك تانية مش بتطلب دا.
هتروح للبنك تخش إدارة التمويل العقاري تديله الظرف وتقوله أنا عاوز أشتري الشقة دي تمويل.. موظف البنك هيفحص الورق وانت قاعد وهياخد رقمك وهتقوم تروح.
أسبوع بالكتير هتلاقي استعلام البنك نزلك مكان شغلك بشكل مفاجيء عشان يسأل عنك وبرضو هينزلك البيت عشان يتأكد إنك شغال ف المكان دا ولا لا وساكن هنا ولا لأ.
بعد ما بينزل الاستعلام هيبقى فاضل خطوة الخبير اللي هينزل يتمن الشقة.. هتروح البنك اللي انت روحته تدفع رسوم تقييم تمنها ٣٥٠ج ودي عشان الخبير اللي ينزل.
أيام من بعد ما تدفع هتلاقي الخبير هينزل يعاين الشقة بناء على العنوان الموجود في العقد بتاعها اللي انت سلمته للبنك.
تقييم الشقة دلوقتي مبقاش زي الأول لأن الخبير فعلا بيقيمها زي سعرها اللي البايع عاوزه وفقا لتمنها الحقيقي فمتقلقش من إن البنك يقيم الشقة أقل دا مش هيحصل.
البنك هيطلعلك الرقم اللي هيمولك بيه بناء على مرتبك.. وفرق الفلوس انت هتدفعه مقدم لصاحب الشقة اللي بيبيعلك.
أيام قليلة وهتلاقي البنك بيتصل بيك انت والبايع عشان تروحوا تمضوا العقود.. والبنك هيحول ليه المبلغ اللي هيمولك بيه ويبقى كدا البايع خد فلوسه كاملة وانت خد شقتك.
