سر الخطة الجديدة.. إزاي مصر روجت لمنتجاتها في غانا لرفع التبادل التجاري إلى 305 ملايين دولار؟
في الوقت اللي مصر فيه مركزة على زيادة صادراتها وفتح أسواق جديدة في أفريقيا ظهر ملف غانا كواحد من أهم الاتجاهات اللي الدولة بتشتغل عليها بقوة الفترة دي، مش بس لأن السوق الغاني كبير ومتنوع لكن كمان لأنه بيحب المنتجات الغذائية عالية الجودة وده فتح قدام مصر فرصة تواجد ضخم وخطة واضحة للترويج للمنتجات المصرية ورفع التبادل التجاري لأرقام جديدة.
لو بصينا على الخطة اللي مصر ماشية بيها في أفريقيا هنلاقي إنها مش مجرد صادرات بتطلع وخلاص لأ دي استراتيجية كاملة للتسويق والانتشار والاقتراب أكتر من المستهلك الأفريقي وده اللي حصل بالظبط في غانا البلد اللي بقت دلوقتي واحدة من أهم محطات التصدير المصري بسبب الطلب الكبير هناك على المنتجات الغذائية المصرية والسمعة الحلوة اللي عملتها صناعتنا في السنين الأخيرة.
الحكاية بدأت من مكتب التمثيل التجاري المصري في أكرا واللي اشتغل الفترة اللي فاتت على فكرة مختلفة وهي إنهم يقدموا المنتجات المصرية للناس بشكل أقرب وأكتر جذب بدل ما تكون مجرد منتجات على الرف .. وفعلاً تم الاتفاق مع واحدة من أكبر سلاسل الهايبرماركت في غانا وهي سلسلة بالاس هايبرماركت السلسلة دي أصلاً مشهورة إنها بتجمع كل أنواع السلع وكمان بتحبها الجاليات العربية فكانت المكان المثالي لتنظيم فعالية كبيرة بعنوان “Taste of Egypt”.
واليوم ده ماكانش مجرد عرض منتجات لأ ده كان عرض مصر نفسها للناس الغانية، كل حاجة اتعملت بشكل يلفت النظر بداية من ديكورات فرعونية مستوحاة من المتحف المصري الكبير اللي العالم كله مركز معاه من وهو لسه في طريقه للافتتاح، وده خلق فضول عند الناس إنها تقرب وتشوف المنتجات جوا الفعالية وكمان يشوفوا شكل الثقافة المصرية.
ومع الجو ده بدأوا يقدموا عينات تذوق من المأكولات المصرية للجمهور الغاني خطوة بسيطة لكن تأثيرها كبير لأن الشعب الغاني بيهتم بالأكل ودايمًا يحب يجرب الجديد والمنتجات المصرية خاصة الغذائية ليها جودة عالية وده خلاهم يتقبلوها بسهولة ويعرفوا إن في سوق جديد يستاهل يتفتح عندهم.
الفاعلية ماوقفتش عند الجمهور بس لأ كمان السفراء العرب وسفير مصر في غانا شاركوا واتمشىّوا وسط المنتجات واتكلموا مع الزوار وده كله خلق صورة أقوى للمنتج المصري وهو داخل السوق الغاني بثقة ومن غير مجهود زيادة.
والتحرك ده جزء من شغل التمثيل التجاري المصري اللي بقاله فترة بيحاول يوسع وجود المنتجات المصرية في أفريقيا ويخليها منافس قوي في أسواق غرب القارة اللي عليها طلب كبير خصوصًا على الأغذية المجمدة والطازجة ودي المنتجات اللي مصر أصلاً قوية فيها.
وخليني اقولك ان الأرقام بتتكلم .. عشان التبادل التجاري بين مصر وغانا وصل لـ 305 مليون دولار في 2024 وده رقم كبير بالنسبة للسوق ده والأقوى إن 296 مليون منهم صادرات مصرية يعني مصر تقريبًا المورد الأساسي في العلاقة دي غير إن صادرات الخضر والفاكهة لوحدها وصلت لـ 2.4 مليون دولار.
يعني من الاخر .. اللي بيحصل في غانا مش فعالية وخلاص لأ دي خطة مدروسة، مصر فيها بتبني وجود ثابت وتخلق علاقة مباشرة بينها وبين المستهلك الغاني ومع الوقت هيسمح بزيادة الصادرات ويخلي المنتجات المصرية ليها مكان ثابت في رفوف الهايبرماركت هناك وده جزء مهم من خطة الدولة لفتح أبواب أفريقيا واحدة ورا التانية وزيادة التبادل التجاري على اد ما نقدر.
