مصر تعيد رسم خريطة التجارة وخدمات الموانئ.. "سفاجا 2" منطقة لوجستية ضخمة لتنمية الصعيد
مصر بتعيد رسم خريطة لتجارة وخدمات المواني، وده من خلال محطة سفاجا 2، بس هل المشروع ده هيغير خريطة التجارة في البحر الأحمر؟، وهل الصعيد أخيرًا هيبقى ليه بوابة بحرية ضخمة تربطه بالعالم كله؟، ويا ترى الممر اللوجستي الجديد هيقدر ينافس المواني العالمية في السرعة والتكلفة؟، وأمتى هنشوف أول سفن عملاقة بتدخل محطة سفاجا 2 بعد انتهاء التجهيزات؟
مصر اليوم بتعيد رسم خريطة التجارة والمواني من أول وجديد، مشروع ضخم بيكبر قدام عينينا، ومحدش يقدر ينكر إنه هيغير شكل البحر الأحمر والصعيد كله، وهو مشروع سفاجا 2، اللي ناس كتير بتتكلم عنه وبتقول إنه هيبقى واحدة من أهم المحطات اللوجستية في المنطقة.
القصة بسيطة، وفي نفس الوقت كبيرة جدًا، لأن الدولة ماشية بخطة واضحة عشان تحول مصر لمركز عالمي للنقل البحري والخدمات اللوجستية، وضمن الخطة دي بييجي مشروع المحطة متعددة الأغراض سفاجا 2، اللي جزء أساسي من مشروع أكبر اسمه ميناء سفاجا الكبير.
خليني أقولك الأول على المساحة، المحطة دي واخدة 776 ألف متر مربع، وطبعا دي مساحة مهولة، وفيها رصيف بطول 1100 متر وعمق 17 متر، وده رقم قليل جدًا من المواني اللي في المنطقة تقدر توصله، العمق ده يخلي الميناء يستقبل أكبر سفن الحاويات والبضايع اللي بتلف العالم.
ولأن الشغل ماشي بسرعة، الشركات الوطنية خلصت البنية التحتية، وبدأوا خلاص في البنية الفوقية، يعني المرحلة اللي بعدها التشغيل على طول.
طب إيه اللي هتستقبله المحطة؟، إنت بتتكلم في 2 مليون حاوية سنويًا، غير 7 ملايين طن من البضايع العامة، يعني مش محطة وخلاص، محطة هتبقى من أكبر وأهم محطات الشحن في البحر الأحمر كله.
لكن اللي أهم من ده، إن سفاجا 2 مش مجرد ميناء، دي بوابة الصعيد للعالم.. وده ليه؟ لأنها جزء رئيسي من الممر اللوجستي المتكامل (سفاجا – قنا – أبو طرطور)، وده واحد من 7 ممرات لوجستية مصر بتنفذهم علشان تزود قوتها التنافسية في سوق الترانزيت.
المحطة هتخدم الأنشطة التعدينية في المثلث الذهبي، وهتساعد في تصدير واستيراد السلع لمحافظات شمال ووسط وجنوب الصعيد، وكمان هتشجع الاستثمارات في التخزين والصناعات اللوجستية، وتسهل نقل البضايع بدل ما يتم تكديسها على الطرق.
الأقوى من كده، أنه هيتم ربط ميناء سفاجا بالخط الثالث للقطار الكهربائي السريع، وده هيخف الضغط عن طرق الصعيد اللي دايمًا زحمة ومجهدة، وهينقل البضاع بكفاءة أعلى وتكلفة أقل بكتير.. غير كده المشروع اتعمل بشراكات عالمية لإدارة وتشغيل وصيانة المحطة، عشان التشغيل يكون بمعايير دولية وتقدر المحطة تجذب خطوط ملاحية كتير من اللي كانت بتعدّي من غير ما توقف.
سفاجا 2 جزء من خطة كبيرة لإعادة هيكلة كل منظومة المواني المصرية، نفس اللي حصل في السخنة والإسكندرية ودمياط والدخيلة، وده كله رايح في اتجاه واحد، وهو رفع تصنيف مواني مصر عالميًا.. ومش بس كده، المشروع كمان هيخلق آلاف فرص العمل لأهالي الصعيد، وده كمان هيفتح الباب لاستثمارات جديدة وصناعات لوجستية ضخمة في المنطقة.
باختصار، سفاجا 2 مش مجرد محطة، ده مستقبل جديد للتجارة، وشريان هيغير شكل الصعيد، وهيحط مصر في مكان مختلف تمامًا على خريطة النقل العالمية.
