تعاون مهم مع اليابان.. قفزة كبيرة في أسعار الدهب.. وطرح جديد للمركزي
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تعاون مهم مع اليابان، وقفزة كبيرة في أسعار الدهب، وطرح جديد للمركزي.
ونبدأ من الهيئة العامة للاستثمار والمناطق الحرة، واللي استضافت فعاليات الدورة الخامسة من اللجنة المصرية اليابانية للترويج والتعاون الاستثماري.
الاتنين اتفقوا على إنهم يرسموا خريطة طريق جديدة للترويج للفرص الاستثمارية المصرية في اليابان خلال السنين الجاية، وده من خلال تنظيم زيارات دورية لوسائل الإعلام اليابانية عشان ييجوا يشوفوا بنفسهم حالة الاستقرار الاقتصادي والسياسي اللي في مصر، وكمان دعوة صناديق وبنوك الاستثمار اليابانية عشان يقيموا الوضع الاقتصادي على أرض الواقع، بالإضافة لتشجيع البنوك اليابانية إنها تموّل استثمارات جوه مصر بما يخدم مصلحة البلدين.
وقال حسام هيبة، إن الحكومة المصرية مهتمة جدًا بجذب الاستثمارات اليابانية لعدة أسباب، أهمها العلاقة الطويلة اللي بين البلدين في مجال التنمية، واهتمام اليابانيين الكبير بتوطين التكنولوجيا الحديثة في مصر.
وأضاف إن السوق المصرية بتقدم للمستثمر الياباني عائد أعلى من المتوسطات العالمية، ولسه فيها فرص ضخمة للتوسع، سواء في السوق المحلي أو حتى من خلال شراكات بين رجال الأعمال في البلدين للاستثمار في باقي أسواق المنطقة.
ونروح بعد كده لسوق الصاغة، واللي شهد ارتفاع واضح في أسعار الدهب خلال تعاملات النهارده في السوق المحلي.
الدهب عيار 21، واللي يعتبر الأكثر تداولًا بين المصريين سواء للادخار أو للزواج، سجل النهارده حوالي 5560 جنيه للجرام.
أما عيار 24، واللي بيعتبر الأعلى من حيث النقاء وجودة المعدن، فسجل حوالي 6445.75 جنيه للجرام، بعد ما كان كسر حاجز الـ6600 جنيه الأسبوع اللي فات.
العيار ده بيجذب المستثمرين اللي بيحبوا يحتفظوا بالدهب الخام، لكن الإقبال عليه مش كبير بسبب سعره العالي مقارنة بباقي الأعيرة.
أما عيار 21، فبلغ حوالي 5640 جنيه للجرام، وده طبعًا الأشهر في مصر لأنه مرتبط بعادات الزواج والادخار، وبيعتبر المؤشر الرئيسي اللي السوق بيمشي عليه.
عيار 18، سجل النهارده حوالي 4834.25 جنيه للجرام، وده العيار اللي بيستهوي الشباب أكتر عشان سعره أقل وتصميماته حديثة ومتنوعة.
أما عيار 14، فوصّل لـ3760 جنيه للجرام، وده الخيار الاقتصادي للّي عايز يشتري دهب بسعر معقول.
أما الجنيه الدهب، فسجل حوالي 45120 جنيه، وبيزن 8 جرام من عيار 21.
وننقل بقى على البنك المركزي المصري، اللي أعلن إنه ناوي يطرح تاني إصدار من الصكوك السيادية بالجنيه المصري، لمدة 3 سنين، بقيمة 3 مليارات جنيه، وبعائد ثابت 21.561%، يوم الاتنين الجاي.
وده بعد ما كان طرح الأسبوع اللي فات أول إصدار من الصكوك السيادية بنفس القيمة، واللي اتغطى أكتر من 5 مرات عن المستهدف!
الحكومة بتستعين بالأداة دي كجزء من أدوات التمويل زي السندات وأذون الخزانة على آجال مختلفة، والبنوك الحكومية بتعتبر أكبر المشترين منها.
ونختم بخبر مهم من البنك الأهلي المصري، اللي أعلن عن توقيع بروتوكول تعاون جديد بيجمع بين النيابة العامة ووزارة الاتصالات وتكنولوجيا المعلومات وشركة أورانج مصر وشركة إي فاينانس، وده بهدف تطوير منظومة الخدمات الرقمية للنيابة العامة وتسهيل عمليات الدفع والتحصيل الإلكتروني من خلال محفظة "أورانج كاش".
وقال محمد الأتربي، الرئيس التنفيذي للبنك الأهلي المصري، إن البروتوكول ده بييجي ضمن استراتيجية البنك في دعم التحول الرقمي وتوسيع قاعدة الخدمات المالية الإلكترونية.
وأكد إن التعاون ده هيساهم بشكل كبير في تطوير خدمات التحصيل الإلكتروني لخدمات النيابة العامة عبر محفظة أورانج كاش، وده طبعًا تحت إشراف البنك المركزي المصري، بحيث يقدر المواطن يسدد الغرامات والمستحقات الحكومية إلكترونيًا بسهولة وأمان، من خلال حلول مصرفية رقمية متطورة بتخدم كل فئات المجتمع.
