600 مليون جنيه لتصنيعها محليا.. 6 شركات مصرية تطلق استثمارات ضخمة لإنتاج الزيوت والفلاتر وهياكل السيارات
قطاع صناعة السيارات في مصر دخل مرحلة جديدة.. 6 شركات مصرية قررت تضخ استثمارات ضخمة بـ600 مليون جنيه لإنتاج قطع غيار السيارات محلياً، من الفلاتر والزيوت لهياكل العربيات، وده كله ضمن خطة الدولة لتقليل الاستيراد وتعزيز الصناعة المحلية.
النهارده هنتكلم عن تفاصيل الاستثمارات دي وإزاي هتغير شكل قطاع السيارات في مصر خلال السنتين الجاية.
مصر كانت لسنين كتير بتعتمد على استيراد قطع غيار السيارات من بره، تقريبًا 98% من احتياجات السوق، وده كان بيضغط على العملة الصعبة ويزود فاتورة الاستيراد.. لكن دلوقتي، الوضع بيتغير، والست شركات الكبيرة قررت تدخل بقوة في الصناعة المحلية.
شركة "برو إنترناشونال للتجارة" خصصت 200 مليون جنيه لبناء مصنع جديد شرق القاهرة، بعد ما كان عندها مصنع منتج فلاتر الهواء والزيوت والتكييف بطاقة إنتاجية 600 ألف فلتر سنويًا بنسبة مكون محلي 50%
الشركة ناوية توسع المنتجات من 100 لحد 130 منتج خلال 2026، مع زيادة الطاقة الإنتاجية بنسبة 66%.
كمان الشركة الوطنية للزيوت استثمرت 200 مليون جنيه في مصنع جديد بالإسكندرية لإنتاج زيوت السيارات، بطاقة مليون عبوة سنويًا، وده هيساهم في تقليل الاعتماد على الاستيراد وفتح أسواق للتصدير.
وشركة "النور" دخلت في صناعة هياكل السيارات، وبتخطط لتصدير حوالي 20% من الإنتاج للخارج، والمصنع الجديد هيبدأ في النصف الأول من 2026 بطاقة إنتاجية 150 ألف قطعة شهريًا، وبيشمل الصدامات والشبكات وأبواب العربيات وأجزاء الصاج.
كمان الشركات زي "SCL لقطع غيار السيارات" و"المتحدة للصناعة والتجارة" مستعدة تضخ استثمارات كبيرة لإنتاج الفلاتر والبوجيهات ودواسات السيارات، مع تطوير خطوط إنتاج جديدة لزيادة الجودة والكفاءة.
والشركات دي مش بس هتنتج للسوق المحلي، لكن كمان هتدعم التصدير وتفتح فرص عمل جديدة، ده غير إنها هتخفف الضغط على العملة الصعبة وتساعد في تعميق الصناعة الوطنية.
يعني الموضوع كله جزء من خطة أكبر للدولة لتوطين صناعة السيارات، وده بيشمل زيادة نسبة المكوّن المحلي في المركبات، ودعم الصناعات المغذية، بحيث مصر تبقى قادرة تصنع عربياتها ومكوناتها بالكامل محليًا خلال السنوات الجاية.
وخليني اقولك ان بعد أزمة استمرت أكتر من 3 سنين بسبب نقص الدولار وارتفاع أسعار القطع، السوق بدأ يستعيد عافيته، والاستثمارات الجديدة دي هتسرع الانتعاش، وتخلق قطاع سيارات أقوى وأكثر استقلالية، وهيخلي مصر أحد المراكز الإقليمية لصناعة السيارات وقطع الغيار.
باختصار، مصر دلوقتي بتنتقل من مستورد كبير لصانع قوي، والفلاتر والزيوت والهياكل مش بس منتجات، دي بداية صناعة محلية متكاملة هتغير ملامح سوق السيارات في مصر تمامًا.
