"هيونداي روتيم" تطلق تحفة هندسية.. ترام الرمل الجديد يغير مفهوم النقل بالإسكندرية
الإسكندرية على وشك تشوف نقلة كبيرة في النقل العام، بعد ما كشفت شركة هيونداي روتيم الكورية عن تصميمات قطارات ترام الرمل الجديدة.
المشروع ده مش بس هيخلي التنقل أسرع وأريح، لكنه كمان هيدي المدينة شكل عصري ومختلف، مع التكنولوجيا الكورية والكفاءة المصرية في التنفيذ.
مشروع تطوير ترام الرمل فيكتوريا هيغير مفهوم التنقل في الإسكندرية بالكامل، الخط هيستقبل 30 قطار جديد، كلهم باللونين الأزرق الفاتح والرمادي، عرباتهم مكيفة بالكامل، والأبواب واسعة والممرات منظمة علشان الحركة تكون سهلة وسريعة للركاب.
القطارات الجديدة سرعتها التصميمية بتوصل لـ80 كم/س، والقطار الواحد بيستوعب حوالي 610 ركاب، يعني هتقدر تنقل عدد كبير جدًا من الناس يوميًا، و العقد بيشمل تسليم الـ30 قطار بالتدريج، والتشغيل التجريبي كله متوقع يخلص في ديسمبر 2027.
والعقد نفسه تم توقيعه في يونيو 2024، وبيشمل ضمان سنتين، وبعدها 8 سنين صيانة كاملة، سواء صيانة خفيفة أو تقوية أو تصحيح الأعطال، مع توريد كل قطع الغيار ونظام لوجستي كامل علشان كل حاجة تمشي بسلاسة.
وخليني اقولك ان خط ترام الرمل بيبدأ من محطة الرمل غرب الإسكندرية ويمتد لحد محطة فيكتوريا شرق ويمر بأحياء مهمة زي الشاطبي، رشدي، جليم، سان ستيفانو، باكوس، وسيدي بشر، ده غير ان الخط ده بيخدم مئات الآلاف من الركاب يوميًا، ويعتبر شريان مهم بيربط أحياء المدينة الحيوية.
مش بس القطارات، البنية التحتية للترام كمان هتتحدث بالكامل، هيتجدد المسار بطول 13.2 كم، وهيتعمل 24 محطة حديثة، منها محطات سطحية ومرفوعة وكمان شوية محطات تحت الأرض
التنفيذ هيتولاه تحالف الشركة العربية للتصنيع وحسن علام القابضة، مع دعم فرنسي من شركة سسترا لضمان إن كل حاجة مطابقة للمعايير الأوروبية للنقل الحضري الحديث.
ومن أهم أهداف المشروع تقليل زمن الرحلة من حوالي ساعة لنص ساعة و5 دقايق بس، وكمان رفع كفاءة التشغيل وتقليل الانبعاثات بالاعتماد على الطاقة الكهربائية النظيفة.
والمشروع ده جزء من خطة مصر للتحول للنقل الجماعي الأخضر وربط النقل داخل المدن الساحلية بالقطار السريع والمترو الخفيف في المستقبل.
بس لما المشروع يخلص في 2027، ترام الرمل هيكون رمز للتحول الذكي في النقل بالإسكندرية، ودمج بين التصميم العصري والموروث التاريخي لأقدم ترام شغال في إفريقيا والشرق الأوسط، و الركاب هيلاقوا وسيلة نقل سريعة، مريحة وصديقة للبيئة، والتجربة هتخلي المدينة تدخل عصر جديد في النقل الحضري.
يعني باختصار، ترام الرمل الجديد مش بس وسيلة مواصلات، ده مشروع هيغير شكل التنقل في الإسكندرية ويخليها مدينة مواكبة للتكنولوجيا والنقل العصري.
