أرقام هامة من البنك المركزي.. عودة الهدوء لسوق الذهب.. وكشف غاز جديد في الصحراء الغربية
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، أرقام هامة من البنك المركزي، وعودة الهدوء لسوق الذهب، وكشف غاز جديد في الصحراء الغربية.
نبدأ من البنك المركزي، اللي كشف في تقرير النشرة الإحصائية عن ارتفاع استثمارات الأجانب في أذون الخزانة، وسجلت حوالي 2.063 تريليون جنيه في نهاية يوليو 2025، بعد ما كانت 1.906 تريليون جنيه في نهاية يونيو اللي قبله.
أما بنوك القطاع الخاص، فزودت استثماراتها في الأذون وسجلت 750.3 مليار جنيه بنهاية يوليو، مقابل 699.6 مليار جنيه في يونيو.
وكمان بنوك القطاع العام رفعت استثماراتها لـ 496.1 مليار جنيه في يوليو، بعد ما كانت 463 مليار جنيه في الشهر اللي قبله.
أما فروع البنوك الأجنبية، فسجلت استثمارات بحوالي 59.1 مليار جنيه في يوليو، مقابل 41.6 مليار جنيه في يونيو 2025.
ونروح بعد كده لـ سوق الصاغة…
النهارده أسعار الذهب شهدت تراجع واضح في السوق المحلية.
وسبب الاهتمام هنا إن عيار 21 هو الأكثر تداولا بين المصريين، سواء للادخار أو للزواج، وسجل النهارده حوالي 5345 جنيه للجرام.
أما عيار 24، فسجل حوالي 6108 جنيه للجرام، وده الأعلى جودة من حيث نسبة الذهب الخالص، بعد ما كان الأسبوع اللي فات تعدّى 6600 جنيه.
العيار ده بيجذب المستثمرين اللي بيحبوا يشتروا الذهب الخام كاستثمار طويل الأمد، بس الإقبال عليه مش كبير أوي بسبب سعره العالي.
عيار 21 – المؤشر الرئيسي للسوق – وصل زي ما قولنا لـ 5345 جنيه للجرام، وده العيار اللي مرتبط بعادات الزواج والادخار عند المصريين.
أما عيار 18 فسجل 4581.5 جنيه للجرام، وده العيار اللي بيقبل عليه الشباب أكتر عشان سعره مناسب وتصميماته متنوعة.
وفيه كمان عيار 14 اللي وصل لـ 3563 جنيه للجرام، وده خيار اقتصادي للناس اللي عايزة تشتري دهب بأسعار أقل.
أما الجنيه الذهب، فسجل النهارده حوالي 42760 جنيه، وبيوزن 8 جرام من عيار 21.
نروح دلوقتي لـ وزارة البترول والثروة المعدنية، اللي أعلنت عن كشف غاز جديد لشركة بدر الدين للبترول في منطقة بدر–15 بالصحراء الغربية، من خلال البئر الجديدة BED 15-31.
الكشف ده جاي ضمن خطة الوزارة لتحفيز الاستثمار وزيادة الإنتاج تدريجيًا عشان نقلل الاعتماد على الاستيراد.
البئر الجديدة دخلت بالفعل على خريطة الإنتاج بمعدل 16 مليون قدم مكعب غاز يوميًا، و750 برميل متكثفات في اليوم.
والمتوقع إن الكشف ده يضيف حوالي 15 مليار قدم مكعب غاز للاحتياطيات المصرية، خصوصًا بعد ما تم اكتشافه في خزان طبقة البحرية السفلى، واللي بيتم دلوقتي إعادة تقييمها لتحديد أفضل أماكن الحفر الجاية، وده هيساعد على زيادة الإنتاج وتعظيم الاحتياطي القومي من الغاز الطبيعي.
ونختم بخبر من المكتب التجاري المصري في وارسو، اللي شارك في فعاليات المؤتمر البولندي–الأفريقي اللي نظمته الغرفة التجارية البولندية بالتعاون مع بنك التنمية البولندي وشركة ضمان الصادرات البولندية في العاصمة وارسو.
وخلال الجلسة الخاصة بفرص الاستثمار للشركات البولندية في أفريقيا، استعرض الملحق التجاري المصري الكيلاني أهم الإصلاحات الاقتصادية اللي نفذتها الحكومة المصرية في السنين الأخيرة، واللي ساعدت في تحسين بيئة الأعمال وزيادة ثقة المستثمرين الدوليين.
وأكد إن مصر عندها قطاعات واعدة جدًا قدام المستثمرين البولنديين، زي الصناعات الغذائية والهندسية والطاقة الجديدة والمتجددة وتكنولوجيا المعلومات، واللي ممكن تبقى باب لشراكات قوية بين الجانبين في المرحلة الجاية.
