صفقة تاريخية مع قطر.. أسعار الذهب تنخفض 450 جنيها.. و5 مليارات دولار صادرات مستهدفة للملابس
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، صفقة تاريخية مع قطر، وأسعار الدهب تنخفض 450 جنيها، و5 مليارات دولار صادرات مستهدفة للملابس.
والبداية من صفقة تاريخية مع قطر.. الحكومة المصرية، ممثلة في هيئة المجتمعات العمرانية الجديدة، وقّعت اتفاق ضخم مع شركة “الديار القطرية” لتطوير منطقة “علم الروم” على ساحل البحر الأبيض المتوسط، باستثمارات إجمالية بتقرب من 30 مليار دولار.
المشروع ده مكانه استراتيجي جدًا، على بعد حوالي 50 كيلومتر غرب “رأس الحكمة”، و12 كيلومتر شرق مدينة مرسى مطروح.
المنطقة دي بجد جنة على الأرض.. مية صافية لونها يخطف العين وطبيعة بكر محدش استغلها صح من سنين، رغم إنها واخدة اسمها “علم الروم” عشان كان فيها زمان قلعة رومانية أيام الفتح الإسلامي لمصر.
الاتفاق بين “الديار القطرية” وهيئة المجتمعات العمرانية بيشمل سداد 3.5 مليار دولار تمن الأرض، وكمان استثمار عيني بقيمة 26.2 مليار دولار علشان تنفيذ المشروع العملاق اللي هيغطي مساحة 4900 فدان على امتداد 7.2 كيلومتر من الساحل الشمالي المصري.
المشروع ده متوقع يحقق إيرادات سنوية مش أقل من 1.8 مليار دولار، وده رقم ضخم هيشعل المنافسة في الساحل الشمالي بين كبار شركات التطوير العقاري.
كمان 15% من أرباح المشروع هتروح لهيئة المجتمعات العمرانية الجديدة، وده معناه إن الدولة هتستفيد بشكل مباشر من أرباح المشروع بشكل مستمر.
ونروح بعد كده لسوق الصاغة، اللي بيعيش حركة قوية اليومين دول. أسعار الذهب في مصر شهدت تراجع كبير خلال الـ19 يوم اللي فاتوا، والعيار 21 — اللي هو الأكتر تداولًا في السوق المحلي — فقد حوالي 450 جنيه من قيمته.
الهبوط ده جه بعد ما العيار 21 سجّل أعلى مستوى له في تاريخه يوم 17 أكتوبر، ووصل لـ5750 جنيه، قبل ما تبدأ موجة التصحيح اللي مستمرة لحد النهارده، وسجّل حوالي 5300 جنيه.
التراجع ده سببه الأساسي موجة تصحيح سعري بعد الارتفاعات الكبيرة اللي حصلت في أسعار الذهب محليًا وعالميًا خلال الفترة الأخيرة.
أسعار الذهب النهارده في مصر كانت كالتالي:
عيار 24 بـ 6057 جنيه
عيار 22 بـ 5552 جنيه
عيار 21 بـ 5300 جنيه
عيار 18 بـ 4543 جنيه
عيار 14 بـ 3533 جنيه
الجنيه الذهب بـ 42840 جنيه
أما الأوقية العالمية فسجلت حوالي 3964 دولار.
وعالميًا، أسعار الذهب نزلت أكتر من 1.5% في تعاملات النهارده، وده بسبب ارتفاع مؤشر الدولار لأعلى مستوى له من 3 شهور، وده ضغط جامد على أسعار المعدن الأصفر.
ونروح بقى لمحمد عبد السلام، رئيس غرفة صناعة الملابس الجاهزة والمفروشات المنزلية في اتحاد الصناعات، اللي قال إن فيه حراك استثماري قوي جدًا، وإن في استثمارات كتير حاليًا عايزة تدخل السوق المصري.
وأكد إن علشان نحقق قفزة كبيرة في التصدير، لازم نوفر بيئة مريحة وسهلة للاستثمار.
عبد السلام كشف كمان إن القطاع حاطط هدف واضح، وهو رفع الصادرات لـ5 مليارات دولار في سنة 2026، وقال إن الهدف ده ممكن جدًا لو توفرت الظروف المناسبة، وأهمها توفير أراضي صناعية للمستثمرين الجداد.
وأشار إن الصادرات دلوقتي وصلت تقريبًا لـ3 مليارات دولار، ومن المتوقع توصل لـ3.6 مليار دولار بنهاية السنة دي.
ونختم بخبر مهم جدًا… في إطار خطة الدولة لتوسيع مشاركة القطاع الخاص في إدارة وتشغيل المرافق الحيوية، استقبل الدكتور سامح الحفني، وزير الطيران المدني، ديميتري كوبيلوزوس، رئيس مجموعة “كوبيلوزوس” اليونانية، علشان يناقشوا آخر تطورات برنامج طرح عدد من المطارات المصرية للتشغيل والإدارة بالتعاون مع مؤسسة التمويل الدولية (IFC).
الحكومة المصرية حاليًا بتستكمل الإجراءات الخاصة بطرح 11 مطار علشان يتم تشغيلهم وإدارتهم من كيانات محلية ودولية متخصصة، وده بهدف تطوير منظومة النقل الجوي ورفع كفاءة الخدمات المقدمة بما يتماشى مع المعايير العالمية.
اللقاء كمان تناول آخر الخطوات اللي اتنفذت خلال الشهور اللي فاتت، وفرص الاستثمار الجديدة في مشروعات البنية التحتية الخاصة بقطاع الطيران.
