إزاي مصر هتوفر 1.5 مليون فرصة عمل؟.. السر في تمويل 228 ألف مشروع
مصر قدرت توفر مليون ونص فرصة عمل للشباب والستات.. بس تفتكروا لو الدولة وسعت برنامج "مشروعك" أكتر، ممكن فعلا نقضي على البطالة؟.. طيب لو أنت مكانهم، كنت هتبدأ مشروع إيه؟.. وهل الشباب فعلاً عندهم أفكار بس محتاجين دعم؟ ولا المشكلة في التنفيذ؟، وشايف أن 36 مليار جنيه كفاية تدفع عجلة الإنتاج في المحافظات؟..
عارف يعني إيه 228 ألف مشروع اتعملوا في مصر؟، ده رقم ضخم جدًا، وراه مجهود سنين ودعم كبير من الدولة للشباب والستات اللي عندهم حلم يبدأوا من الصفر.. وده بعد ما أعلنت وزارة التنمية المحلية أن مشروع "مشروعك" من 2015 لحد دلوقتي مول أكتر من 228 ألف مشروع صغير ومتوسط في كل محافظات مصر، بإجمالي قروض وصلت لـ36 مليار جنيه.
والأهم أن المشاريع دي وفرت حوالي مليون ونص فرصة عمل ما بين مباشر وغير مباشر، يعني أكل عيش لناس كتير جدًا في القرى والمراكز والمدن.
الحكومة قالت إن الهدف من "مشروعك" مش مجرد قروض وخلاص، لكن تمكين حقيقي للشباب والمرأة، يعني تساعدهم يعتمدوا على نفسهم، يفتحوا مشروعهم ويشتغلوا ويكسبوا ويخلقوا فرص لغيرهم كمان.. وقالت كمان إن الدولة ماشية بخطة واضحة في دعم المشروعات الصغيرة والمتوسطة، لأنها بقت من أهم محركات الاقتصاد الوطني، وبتساهم في النمو وتشغيل الشباب وتقليل البطالة.
الإنجاز ده وراه أرقام كبيرة جدًا، زي مثلا في محافظة سوهاج طلعت رقم واحد، وعملت أكتر من 24 ألف مشروع، بإجمالي قروض حوالي 5 مليار جنيه، ووفرت 164 ألف فرصة عمل، بعدها محافظة المنيا بـ24 ألف مشروع تقريبًا، وقروض بـ3.5 مليار جنيه، يعني 160 ألف فرصة عمل، وجت البحيرة في المركز التالت بـ20 ألف مشروع بقروض قيمتها 2 مليار، ووفرت أكتر من 100 ألف فرصة عمل.. أما الدقهلية، سجلت حوالي 19 ألف مشروع، وقروض بـ2.4 مليار جنيه، وفروا 109 ألف فرصة عمل.
لكن الجميل بقى، أن "مشروعك" مش بس بيدي فلوس، ده كمان بيساعد الشباب بفريق فني وتسويقي في كل المحافظات، عشان المشروع ينجح ويتوسع.. يعني حتى اللي لسه مش عارف يبدأ منين، بيلاقوا مكاتب "مشروعك" في كل مركز وقرية تساعده، وتعمل له دراسة جدوى وتتابع معاه خطوة بخطوة.
وزارة التنمية المحلية، ناوية تزود عدد المكاتب دي في الفترة الجاية، وتعمل حملات توعية وتدريب عشان كل شاب أو ست عندهم فكرة مشروع يعرفوا الطريق، وده كله جزء من خطة مصر علشان تخلق فرص عمل حقيقية وتدعم التنمية المحلية، لأن "مشروعك" باب أمل مفتوح لكل اللي عنده حلم وعايز يبدأ.
