باستثمارات 7 مليارات دولار .. مشروع مصري قطري هيغير معالم السياحة.. إيه الحكاية؟
7 مليار دولار استثمار جديد هينزل على الساحل الشمالي.. هيغير خريطة الاستثمار السياحي والعقاري في مصر كلها.. طب إيه حكاية الاستثمارات دي؟.. ومين اللي هيضخها.. وهتعود على مصر بإيه.. خليك معايا عشان تعرف كل التفاصيل.
في مشروع ضخم اسمه علم الروم بيتجهز دلوقتي على مساحة 60 ألف فدان يعني حوالي 252 كيلو متر مربع.. انت متخيل المساحة.
المشروع هيكون واحدة من أكبر المشروعات فى الساحل الشمالي.. هيمتد على بعد 50 كيلو من رأس الحكمة وشرق مرسى مطروح.. والأرض المخصصة للمشروع لوحدها قيمتها 4 مليار دولار.
لكن خليني اقولك أن قطر لوحدها هتدخل بالاستثمار كله 7 مليار دولار.. وحكومة مصر هتاخد على حصة من الأرباح بين 15 لـ20% المشروع هيتم على مراحل على مدار 10 سنين يعني حاجة متخططة ومضمونة.
طيب وإيه اللي هيبقى موجود هناك
كل حاجة تتخيلها وماتتخيلهاش فنادق ومنتجعات عالمية شاليهات وفيلات وشقق بإطلالات بانورامية على البحر مرسى عالمي لليخوت مناطق تسوق ومطاعم وكمان مدارس ومستشفيات ومرافق صحية كل ده على مساحة هائلة مع بنية تحتية متكاملة وشبكات كهرباء ومياه ومواصلات.
المكان نفسه ليه أهمية سياحية وطبيعية اسمه علم الروم على اسم قلعة رومانية قديمة شواطئه خلابة وصحراويه ساحرة وده هيخلي الناس اللي بتحب رحلات السفاري والصيد الطبيعي يتحمسوا يزوروه.
الجانب الاقتصادي كمان ضخم المشروع هيوفر آلاف فرص الشغل في البناء والسياحة والخدمات وهيزود تدفقات الاستثمار الأجنبي لمصر وخصوصًا من الخليج الساحل كله هيبقى على الخريطة العالمية كوجهة سياحية واستثمارية
يعني الأرقام كلها بتتكلم 7 مليار دولار استثمار 4 مليار دولار قيمة الأرض 60 ألف فدان مساحة المشروع 10 سنين تطوير 50 كيلو من رأس الحكمة 15 لـ20% حصة الحكومة كلها أرقام كبيرة بتوضح حجم المشروع وطموحه.
