خزينة مصر تنتعش.. غزو قوي لصادرات الغزل والمنسوجات
الاقتصاد المصري انتعش بـ875 مليون دولار في 9 شهور بس، وده من صادرات الغزل والمنسوجات اللي مصر متفوقة فيها، بس هل هنقدر نكمل بنفس المعدل التصاعدي ده لحد نهاية السنة؟، وهل ممكن نوصل في 2026 لأكتر من مليار ونص دولار صادرات في الغزل والمنسوجات؟.. وإيه اللي محتاجينه علشان نحافظ على النمو ده؟
صادرات الغزل والمنسوجات المصرية عاملة حالة نشاط كبيرة في الاقتصاد المصري خلال سنة 2025، وبتثبت يوم بعد يوم أن الصناعة دي واحدة من أقوى الصناعات التصديرية في البلد.. النتايج الأخيرة بتقول إن الصادرات وصلت لـ875 مليون دولار من يناير لحد سبتمبر، يعني زيادة حوالي 3.4% عن نفس الفترة السنة اللي فاتت، واللي كانت 846 مليون دولار.
المهندس هاني سلام، رئيس المجلس التصديري للغزل والمنسوجات، قال إن القطاع قدر يحقق 71% من المستهدف السنوي اللي هو 1.236 مليار دولار، وده قبل نهاية الربع التالت، وده إنجاز كبير يعكس إننا ماشيين في الاتجاه الصح.
القطاع كمان مر ببعض التفاوت الطبيعي على مدار الشهور، فمثلًا في مارس الصادرات سجلت 108 مليون دولار، وفي مايو وصلت لـ 110 مليون دولار، وده أعلى رقم في السنة، وبعدها يوليو حققت 105 مليون دولار.. لكن في أغسطس وسبتمبر حصل تباطؤ بسيط في الطلب، خصوصًا في بعض الأسواق الأوروبية، وده بسبب تراجع حركة الاستيراد هناك، مش ضعف في الإنتاج المصري.
رئيس المجلس وضّح كمان أن الاتجاه التصاعدي اللي بدأ من أول السنة سببه التوسعات الإنتاجية والتكامل الصناعي اللي حاصل جوه مصر، سواء في مصانع الغزل أو النسيج أو الخياطة، وده خلى السلاسل التوريد المحلية تبقى أقوى وأكتر استقرار.. أما عن القطاعات الفرعية، فالأقمشة كانت هي البطل السنة دي، واحتلت الصدارة بإجمالي 424 مليون دولار، يعني حوالي 48% من إجمالي الصادرات، وده بنمو 7% عن السنة اللي فاتت.
في المركز التاني جِه قطاع الغزول وخيوط الخياطة بـ194 مليون دولار، بعده المنسوجات التقنية بـ129 مليون دولار بنسبة 15% من الإجمالي، وأخيرًا قطاع الألياف بـ123 مليون دولار بنسبة 14%.
الملفت كمان إن المنسوجات التقنية كانت الأعلى نموًا بنسبة 29%، بسبب زيادة الطلب على الأقمشة غير المنسوجة والمنتجات الصناعية اللي ليها استخدامات خاصة زي الفلاتر والمستلزمات الطبية.
أما من ناحية المنتجات، فـ الأقمشة المنسوجة من الألياف الصناعية كانت في القمة بقيمة 224 مليون دولار، بنمو 15%، بعدها الأقمشة غير المنسوجة بـ103 مليون دولار، وبعدهم الغزول القطنية بـ98 مليون دولار، وأقمشة الدينم (الجينز) بـ96 مليون دولار.
يعني من الآخر، قطاع الغزل والمنسوجات مش بس بيصدر أرقام، لكن كمان بيمثل نموذج حقيقي لصناعة مصرية بتتعافى وبتقوى، وبتساهم حرفيا في دعم الاقتصاد وتوفير عملة صعبة، وبتأكد أن الصناعة المحلية تقدر تنافس وتكسب في السوق العالمي.
