تحرك جديد من المركزي.. انهيار في أسعار الدهب.. وتعديل تكلفة إنتاج رغيف الخبز المدعم
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك جديد من المركزي، وانهيار في أسعار الدهب، وتعديل تكلفة إنتاج رغيف الخبز المدعم.
نبدأ من البنك المركزي المصري اللي سحب سيولة بـ146 مليار جنيه في عطاء السوق المفتوح من 13 بنك النهارده، بعائد 21.5%.
المركزي قبل كده كان نازل بتعليمات بتنظيم العملية الرئيسية لربط الودايع في السوق المفتوح عن طريق مزاد ثابت السعر أسبوعيًا، وبيعلن حجم العملية اللي هيعملها، وبيتم قبول العطاءات بأسلوب التخصيص على حسب نسبة العطاء المقدم من كل بنك من إجمالي العطاءات، وبيتطبق عليها سعر العملية الرئيسية.
لكن المركزي أكد إنه حرصًا على اتباع أفضل الممارسات الدولية في إدارة فائض السيولة داخل الجهاز المصرفي، ولتحسين وصول أثر قرارات السياسة النقدية، قرر يغيّر أسلوب القبول من “التخصيص” إلى “قبول كل العطاءات المقدمة بالكامل”، وهينشر نتيجة كل عملية ربط على الموقع الإلكتروني للبنك المركزي.
وهيفضل المركزي يدير السيولة بالشكل اللي يخلّيها متسقة مع هدفه الأساسي، وهو الحفاظ على متوسط سعر العائد لليلة واحدة بين البنوك حوالين سعر العملية الرئيسية اللي هو متوسط الكوريدور.
ونروح لسوق الصاغة… أسعار الدهب في أكتوبر لعبت فوق وتحت. في النص طلعت جامد وبعدين رجعت نزلت تاني تقريبًا لنفس المستويات قبل اجتماع الفيدرالي الأميركي، ومع اقتراب الأونصة من مستوى الـ 4000 دولار.
محليًا أول الشهر عيار 21 كان 5080 جنيه، و24 كان 5805، و18 كان عند 4354. في نص الشهر الأسعار ولعت، 21 طلع لـ5800، و24 لـ6600، و18 لـ5000. لكن آخر الشهر وقبل ساعات من الفيدرالي رجع 21 عند 5300 بخسارة حوالي 400 جنيه، و24 نزل لـ6034.
ونروح لقرار مهم… التموين قررت تعدّل تكلفة تصنيع رغيف العيش البلدي المدعم في المخابز اللي بتشتغل بسولار، وده بعد ما البترول أعلنت رفع أسعار الوقود.
البنزين 95 بقى 21 بدل 19، و92 بقى 19.25 بدل 17.25، و80 بقى 17.75 بدل 15.75، والسولار بقى 17.5 بدل 15.5، وغاز العربيات بقى 10 جنيه بدل 7.
على الأساس ده بقت تكلفة إنتاج الرغيف المدعم اللي المواطن بيدفع فيه 20 قرش بالشكل ده:
— الرغيف الطري (سولار): 11.59 بدل 9.23.
— الرغيف الملدن (سولار): 15.73 بدل 13.52.
— الرغيف المجر: 10.53 بدل 8.86.
والقرار بيقول إن هيئة السلع التموينية هتتحمل فرق التكلفة بعد خصم اللي المواطن بيدفعه، وهيتم سداد التأمينات لعمال المخابز للهيئة القومية للتأمين الاجتماعي.
ونختم من المنطقة الاقتصادية لقناة السويس… رئيس الهيئة وليد جمال الدين، ومعاه نائب محافظ الإسماعيلية أحمد عصام الدين، حطوا حجر أساس لمشروعين جداد في القنطرة غرب الصناعية في قطاع المنسوجات والملابس الجاهزة، باستثمارات 20.5 مليون دولار، وبيوفروا 4600 فرصة عمل مباشرة على مساحة 68 ألف متر.
ده حصل بحضور رؤساء شركات “توب نيو” و“توب نيو جارمنت” و“توب كريديت تكستايل”.
وجمال الدين شكر المستثمرين، وقال إن المرحلة الأولى من تطوير القنطرة غرب حققت لحد دلوقتي 44 مشروع بين تعاقد وتنفيذ باستثمارات 1.17 مليار دولار، على مساحة 2.8 مليون متر، وخلقوا 60 ألف فرصة عمل خلال سنتين بس من بداية التطوير.
