حاجة هتحصل يوم الخميس ممكن تقلب سوق الدهب.. العالم كله مستنيها
الليلة الكبيرة اللي السوق كله مستنيها قربت.. يوم الخميس اللي جاي اجتماع رسمي بين الرئيس الأمريكي دونالد ترامب ورئيس الصين شي جين بينج واللقاء ده هيتحدد عليه بنسبة كبيرة مستقبل الدهب الفترة الجاية.. فيا ترى ايه اللى ممكن يحصل فى الاجتماع ده ؟ وإزاي ممكن يعمل قلبان لأسعار الدهب سواء محليا أو عالميا؟
العالم كله مترقب ومستنى يعرف ايه اللى هيحصل فى اجتماع الرئيس الأمريكي بنظيره الصيني يوم الخميس الجاي.. الاجتماع اللى جاى بعد توترات اقتصادية ورسوم جمركية متبادلة بين واشنطن وبكين.
طب ليه الدهب تحديدًا أكتر سلعة ممكن تتأثر باللى هيحصل فى اللقاء ده ؟
لأن الدهب مش معدن… الدهب ترمومتر خوف أي توتر بيطير لفوق، أي انفراجة بيتهد ويرجع يصحّح.. والاجتماع ده طالع من رحم صراع اقتصادي طويل بين أكبر اقتصادين في العالم وبالتالي قراراته أو حتى نبرة الكلام اللي هتطلع منه هتنعكس فورًا على شاشات الأسعار.
الأسواق مترقبة الاجتماع وهي شايلة سيناريوهين يا تصالح مبدئي وتهدئة يا تجميد رسمي وتصعيد.. الصين داخلة وهي تحت ضغط تباطؤ في الطلب العالمي وأمريكا داخلة وهي تحت ضغط تضخم ودولار قوي وسباق انتخابات مفتوح يعني الاتنين محتاجين يعملوا حركة تكسب رأي عام داخلي مش بس قرار اقتصادي.
لو الاجتماع خرج برسالة انفراجة حتى لو من غير اتفاق نهائي ده معناه انحسار جزء من “سعر الخوف”، المستثمرين يبيعوا دهب ويجروا على الأصول الخطرة: أسهم، سندات، عملات ساعتها الدهب ممكن يعمل هبوط حاد عالميًا، وده يترجم محليًا بهبوط في السوق الداخلي حتى لو الجنيه ثابت لأن السعر المحلي مرآة للسعر العالمي.
ولو العكس وخرج الاجتماع بنبرة تجميد أو مواجهة أو شروط قاسية السوق هيفهم إن الصدام لسه مستمر، الخوف يشتعل، المستثمرين يزوّدوا مراكزهم في الدهب كملاذ وهنا الطلوع يبقى عنيف لأن السوق أصلًا داخل الاجتماع وهو في حالة حساسة بعد تصحيح آخر أسبوعين أي شرارة صغيرة فوق التوتر الحالي تكفي علشان السعر يطير.
بعد الاجتماع مش لازم نستنى قرارات مكتوبة مجرد الجملة الأولى في المؤتمر الصحفي، لغة الجسد، ترتيب الكلمات، حتى ابتسامة أو غياب ابتسامة كفيل إنه يحرك سبائك بمليارات.
محليًا.. سوق الصاغة بيتحرك دايمًا على منحنيين: الدولار والدهب العالمي. الدولار حاليًا في حالة ترقب واستقرار نسبي، فلو الدهب العالمي اتشقلب الخميس السوق المصري الأسعار فيه هتطير فورًا، مش هيستنى أسبوع. يعني اللي داخل يشتري أو يبيع لازم يبقى عارف إن آخر سعر قبل الخميس مش هو السعر المرجعي السعر الحقيقي هيتولد بعد الاجتماع.
التوقع الأقرب؟ السوق داخل الاجتماع وهو مسعّر حالة انتظار يعني احتمال الحركة بعده أعلى من الحركة قبله مافيش سيناريو تالت إما انفراجة تهد السعر أو توتر يشعله مفيش منطقة رمادية في اللقاء ده.
طب ايه اللى هيحصل بعد اللقاء؟
لو حصل تهدئة الدهب يكمل تصحيح على مدى أيام لو حصل تصعيد الطلوع هيبقى سريع ثم يهدا علشان السوق ياخد نفس تاني.. فاللي ناوي يبيع يستنى يشوف النبرة اللي هتطلع الخميس واللي ناوي يشتري يا إمّا يشتري جزء صغير قبل الاجتماع ويكمّل بعد الصورة يا إمّا يستنى القرار بالكامل لأن الاجتماع ده مش خبر عابر ده حدث هيعيد ضبط الاتجاه مش شكله.
