كنز جديد في مصر.. أكبر مجمع صناعي لاستخلاص العناصر النادرة من الكاولين والجلوكونيت
مصر بتخصص أنها تعمل أكبر مجمع صناعي لاستخلاص العناصر النادرة، بس هل ده ممكن يكون بداية حقيقية إن مصر تدخل سباق الصناعات المتقدمة؟، وإزاي ممكن العناصر النادرة دي تغير مستقبل الصناعة في مصر؟، وهل فعلاً المجمع ده هيخلي مصر تنافس دول زي الصين اللي مسيطرة على سوق العناصر النادرة؟، وإيه دور هيئة المواد النووية في المشروع ده؟ وليه 95٪ من العناصر النادرة بتكون جنب المواد النووية أصلا؟..
مصر ماشية بخطوات ناجحة جدًا في جميع القطاعات، لكن دلوقتي داخلة على مشروع من العيال التقيل، يعني مش مجرد مصنع ولا مشروع صغير، ده هيكون مجمع صناعي متكامل لإنتاج الأسمدة واستخلاص العناصر النادرة من معادن زي الكاولين والجلوكونيت، ودي خامات موجودة في أرض مصر، محدش كان بيستغلها بالشكل الصح قبل كده.
الكاولين والجلوكونيت دول مش مجرد تراب أو طين عاديين، دول فيهم عناصر نادرة وحرجة بتدخل في صناعات ضخمة، زي الإلكترونيات والطاقة والتكنولوجيا الحديثة.
والصناعة دي بالذات، هتخلي مصر بتتحرك ناحية المستقبل بخطوات محسوبة، وبتقول للعالم: "إحنا مش هنبيع الخام تاني.. إحنا هنصنع ونضيف قيمة".. وده اللي اتقال في الاجتماع المهم بين محمود عصمت، وزير الكهرباء والطاقة المتجددة، مع خبراء من كلية هندسة عين شمس، ومعاهم كمان هيئة المواد النووية، وده لأن 95٪ من العناصر النادرة دي بتكون موجودة جنب المواد النووية.. فالموضوع مش بس "كاولين وجلوكونيت"، دي قصة موارد ضخمة ممكن تغير شكل الصناعة في مصر كلها.
الاجتماع ناقش الأماكن اللي ممكن يتبني فيها المجمع، وأماكن وجود الخامات دي، وكمان مراحل التصنيع والاستخلاص اللي هتتحط ما بين مواقع التعدين والمصانع، عشان كل حاجة تمشي بخطة واضحة ومنظمة.
تخيل بقى إن المشروع ده مش بس هيطلع أسمدة عضوية متطورة، ده كمان هيستخلص مواد نادرة قيمتها عالية جدًا في السوق العالمي.. الجميل كمان إن الدراسات اللي اتعملت الفترة اللي فاتت أكدت إن الخامات دي موجودة بكميات ضخمة جدًا، وجاهزة من غير ما نحتاج نعمل عمليات تعدين معقدة.. يعني الموارد موجودة والتكنولوجيا جاية والدولة ناوية تشتغل صح.
الموضوع ده كمان بيتابعُه الرئيس عبد الفتاح السيسي بنفسه، ضمن الاستراتيجية الوطنية لاستكشاف وتعدين الخامات النووية والعناصر الاقتصادية المصاحبة، لأن الهدف النهائي إن مصر تبقى دولة بتصنع وتصدر منتجات عالية القيمة بدل ما تبيع الخامة بثمن قليل.
يعني في الآخر، نقدر نقول إن المجمع الصناعي ده مش بس خطوة اقتصادية، دي قفزة علمية وصناعية هتخلي مصر من الدول القليلة اللي بتدخل مجال استخلاص العناصر النادرة، وده مجال عليه منافسة عالمية كبيرة، بس المرة دي مصر داخلة وهي عارفة بتعمل إيه، وبخطة واضحة علشان تعظم الاستفادة من كل حتة في أرضها.
