فاكهة الجنة في مصر.. "الرامبوتان" الاستوائية تصل الأسواق.. والكيلو يلامس ألف جنيه
فاكهة شكلها غريب، وطعمها ولا في الخيال، اسمها "الرامبوتان" أو زي ما بيسموها "فاكهة الجنة"!
ظهرت فجأة في الأسواق المصرية، وسعر الكيلو منها وصل لألف جنيه! الناس كلها بدأت تسأل: إيه الفاكهة دي؟ وجت مصر إزاي؟ وليه الكيلو فيها بالسعر ده؟
تعالوا نفهم مع بعض حكاية الرامبوتان اللي العالم كله بيجري وراها.
فاكهة الرامبوتان أصلها من ماليزيا وإندونيسيا، وبتعتبر من أشهر الفواكه الاستوائية في جنوب شرق آسيا.
وبالنسبة لأسمها "رامبوتان" معناه "شعر" باللغات الإندونيسية والماليزية، وده لأن شكلها فعلاً شبه الكورة الصغيرة المتغطية بشعر أحمر مجعد.. لكن جواها مفاجأة .. لب أبيض شفاف طعمه حاجة كده ما بين العنب والليتشي، وريحته تفتح النفس!
بس خليني اقولك ان زراعة الرامبوتان محتاجة حرارة عالية ورطوبة مستمرة، وعلشان كده كانت صعبة جدًا على المناخ المصري.
لكن في السنين الأخيرة، بعض المشاتل في إدكو والمناطق الساحلية قررت تجرب تزرعها داخل صوب خاصة، وبالفعل نجحوا يطلعوا أول إنتاج مصري محدود منها.
وبعدين الفاكهة دي بدأت تظهر في سلاسل المحلات الكبيرة في القاهرة والإسكندرية بأسعار خيالية، وصلت لـ 1000 جنيه للكيلو الواحد، وده لأن إنتاجها المحلي لسه قليل جدًا ومكلف، ولسه بتتزرع على نطاق تجريبي صغير.
يعني الرامبوتان مش بس شكلها ملفت وطعمها لذيذ، دي كمان فاكهة غنية بالفوايد:
عندك مثلا بتساعد على إنقاص الوزن لأنها قليلة السعرات وغنية بالألياف.
وبتحسن الهضم وتقوي المناعة لأنها مليانة فيتامين C.
وبتقلل الالتهابات وتساعد في محاربة الخلايا السرطانية بفضل مضادات الأكسدة اللي فيها.
وكمان بيستخرجوا من بذورها زبد طبيعي يستخدم في صناعة الصابون والشموع!
وشجرة الرامبوتان بتبدأ تثمر بعد حوالي 4 سنين من الزراعة، والإنتاج بيزيد مع الوقت لحد ما توصل الشجرة الواحدة لأكتر من 150 كيلو ثمار في السنة
وبيتزرع في الفدان الواحد حوالي 30 شجرة تقريبًا، وبيكون إنتاجها التجاري بعد 6 إلى 8 سنين من الزراعة.
بس خليك عارف ان الفاكهة دي مش مجرد موضة او حاجة جديدة والسلام، دي ممكن تكون بداية جديدة لزراعة الفواكه الاستوائية في مصر، خصوصًا مع الاتجاه الحديث لتنوع المحاصيل وزيادة الصادرات.
ولو نجحت زراعتها على نطاق واسع، مصر ممكن تبقى من الدول اللي بتصدر الرامبوتان للعالم العربي وأوروبا كمان.
