الطاقة تحكم المعادلة.. مصر هتربط قارتين بخط كهرباء واحد
مصر داخلة على مرحلة جديدة تمامًا في ملف الطاقة، بعد ما كانت بتكافح عشان توفر كهربا للبيوت والمصانع، النهارده بقت جاهزة تصدر كهربا لأوروبا كلها!.
الخطة ببساطة إن مصر توصل شبكتها بالكهرباء الأوروبية من خلال 3 خطوط ضخمة تحت البحر المتوسط، بإجمالي قدرة 8 جيجاوات.
والخطوط دي هتربطها بقبرص، واليونان، وإيطاليا، عشان تبقى مصر مركز رئيسي للطاقة في المنطقة.
مصر شغالة حاليًا على 3 مشروعات ربط كهربائي، كل مشروع لوحده كبير، لكن مع بعض بيعملوا منظومة قوية هدفها واحد: إن مصر تبقى المصدر الأساسي للكهربا لأوروبا.
أول مشروع هو الربط بين مصر وقبرص واليونان، وده معروف باسم EuroAfrica Interconnector
الخط ده قدرته حوالي 2000 ميجاوات وطوله قرابة 500 كيلومتر بين مصر وقبرص، وهو أول جسر كهربائي بيربط أفريقيا بأوروبا. بس المشروع ده مهم جدًا لأنه بيكسر عزلة قبرص الكهربائية، وبيفتح لمصر أول طريق مباشر لتصدير الطاقة.
والمشروع التاني اسمه GREGY Interconnector، وده بين مصر واليونان برضو، بقدرة 3000 ميجاوات وطول حوالي 950 كيلومتر.
الميزة هنا إن الخط ده هيوصل الطاقة المتجددة من مصر لأوروبا بشكل مباشر من غير ما يعدي على دول تانية، وده اللي بيخليه من أكتر المشاريع طموحًا في المنطقة.
أما المشروع التالت فهو The Green Vein اللي هيربط مصر بإيطاليا، وده هيكون الأطول بحوالي 2800 كيلومتر تحت البحر، وبقدرة كمان 3000 ميجاوات.
المشروع ده هيفتح باب مصر على أوروبا الغربية، ويخليها لاعب رئيسي في أمن الطاقة الأوروبي. الخطة دي جاية بعد ما مصر بنت خلال السنين اللي فاتت فائض ضخم من الكهرباء، بفضل محطات "سيمنز" العملاقة ومشروعات الطاقة الشمسية والرياح اللي اتعملت في كل حتة.
دلوقتي الفائض ده جاهز يتصدر، خصوصًا بعد ما أوروبا بدأت تقلل اعتمادها على الغاز الروسي وتدور على بدائل نظيفة.
من أبرز مشاريع الطاقة المتجددة اللي بتعتمد عليها مصر النهارده:
محطة أبيدوس في كوم أمبو بأسوان، بقدرة 1500 ميجاوات.
ومجمع بنبان للطاقة الشمسية اللي بينتج حوالي 3.8 تيراواط ساعة في السنة.
مشروع سكاتك للرياح في رأس شقير بقدرة 900 ميجاوات.
وكمان مشروع أكوا باور في خليج السويس بقدرة 1100 ميجاوات.
والمشروعات دي هي اللي هتمد خطوط الربط الجديدة بالطاقة النظيفة اللي هتوصل لأوروبا، وده معناه إن الكهرباء اللي هتخرج من مصر هتكون "خضراء"، متوافقة مع أهداف الاتحاد الأوروبي للحياد الكربوني.
وخليني اقولك ان الاتحاد الأوروبي نفسه بيدعم المشروعات دي، وبيعتبرها من "مشروعات المصلحة المشتركة"، وبيشارك في تمويلها بمليارات الدولارات. وده مش بس علشان أوروبا محتاجة كهربا، لكن كمان علشان شايفين إن مصر هتبقى بوابة الطاقة الجديدة لأوروبا.
وفي النهاية، المعادلة بقت واضحة: كل ميجاوات أوروبا هتعتمد فيها على مصر، هتزود من قوة القاهرة ونفوذها في المنطقة. يعني ببساطة .. مصر ما بتصدرش كهربا بس، مصر بتصدر نفوذ واستقرار، وبتحط نفسها في قلب خريطة الطاقة العالمية.
