من المطارات لقناة السويس.. مصر بتتحول لمركز لوجستي عالمي.. هيدخل مليارات للبلد
في إنجاز تاريخي جديد.. مصر هتبني محور لوجستي عالمي هيدخل ملايين الدولارات للبلد وهيجذب المستثمرين من كل مكان في العالم.
فيه مشروع ضخم بيترسم دلوقتي في مصر.. مشروع لو اكتمل على الشكل اللي الدولة مخططاه هينقلنا نقلة كبيرة جدا في خريطة التجارة العالمية.. طب إيه تفاصيل المشروع.. ومصر هتستفيد منه إزاي؟ وهيحقق إيه.. ده اللى هنعرفه فخليكم معانا.
إحنا مش بنتكلم عن تطوير مطار ولا توسيع قناة لا إحنا بنتكلم عن مصر وهي بتجهز نفسها علشان تبقى مركز لوجستي عالمي بيربط بين قارات مش مجرد دول
البداية كانت بتوجيه مباشر من الرئيس عبد الفتاح السيسي بإنشاء مناطق استثمارية متكاملة حوالين المطارات..
يعني المطارات مش هتبقى بس بوابات للسفر دي هتتحول لمناطق شغل واستثمار وصناعة وتجارة.. وفي نفس الوقت قناة السويس بتتحول لمركز ضخم بيجمع مواني ومصانع ومناطق لوجستية وتجارة طاقة يعني البحر والجو بيكملوا بعض علشان يعملوا ممر لوجستي عبقري بيربط بين البحر الأحمر والبحر المتوسط ومنهم للعالم كله
الفكرة هنا مش بس في الإنشاءات الفكرة إنك بتخلق شبكة ذكية تنقل بضايع وخدمات وتقلل زمن وتكلفة النقل وكل ده مع بنية تحتية قوية ودعم سياسي مباشر واهتمام حقيقي من الدولة بالاستثمار الكلام ده بيخلي مصر مش مجرد نقطة عبور بيخليها حلقة وصل أساسية لأي شركة عالمية عايزة تفتح لها مركز توزيع إقليمي جوه أفريقيا أو بين آسيا وأوروبا.
ده غير فرص الشغل اللي هتتخلق والدخل اللي هيزيد من قطاع النقل واللوجستيات لو فعلاً المحور ده اكتمل بالشكل المتكامل ما بين الجو والبحر هنشوف مصر لأول مرة في قلب أكبر محور تجاري في الشرق الأوسط وأفريقيا محور بيربط القارات ويصنع مستقبل مختلف واقتصاد قائم على الحركة والتكامل مش على الحدود والتجزئة.
