بعد ارتفاع البنزين.. يحصل ايه لعربيتك لو فولتها ببنزين 80 بدل 92
الإثنين 20/أكتوبر/2025 - 05:00 ص
تفتكر ايه اللي ممكن يحصل لعربيتك لو استخدمت بنزين 80 بدل 92 ، واصلا ينفع تستخدم بنزين غير اللي متعودة عليه عربيتك.
شوف، خبراء نادي السيارات الألماني بيأكدوا إن أحسن حاجة تعملها إنك تلتزم بنوع البنزين اللي الشركة المصنعة لعربيتك موصياه بيه، عشان ده أنسب نوع للموتور ومش هيعملك مشاكل.
لكن لو حبيت تغيّر نوع البنزين لأي سبب، لازم تلاحظ أداء العربية كويس جدًا.
لو حسيت إن عزمها بقى أقل من الطبيعي أو إن صوت الموتور بقى أعلى من المعتاد، أو حتى لاحظت إن الدخان بقى أكتر من العادي — فده معناه إن نوع البنزين مش مناسب لعربيتك.
كمان لو سمعت صوت “تكتكة” أو “فرقعة” وانت دايس بنزين أو العربية بتعمل صوت غريب لما تزود السرعة فجأة — يبقى كده البنزين اللي حاطه أقل من المطلوب، ولازم تغيّره فورًا قبل ما يبوّظلك الموتور.
